Cüdo üzrə Azərbaycan millisinin üzvü, 2022-ci ildə 23 yaşadək idmançılar arasında Avropa çempionu olmuş Nazir Talıbovun (66 kq) Prosport.Az saytına müsahibəsi

– Ötən ilin sonunda Azərbaycan çempionatının qalibi oldunuz. Turnirdə çıxışınızı necə dəyərləndirərdiniz?
– Dekabrda Azərbaycan çempionu oldum. Artıq 3-cü dəfə idi ki, böyüklər arasında Azərbaycan çempionu olurdum. Yarışa çox yaxşı hazırlaşmışdım. Özümü tam hazır hiss edirdim. Rəqabət güclü idi, amma bu rəqabətdən mən qalib ayrıldım və ölkə çempionu oldum.

– Fevralda Parisdə Böyük Dəbilqə turniri oldu. Portuqaliyalı Miqel Qaquya uduzdunuz. Bu yarışda çıxışınızı necə dəyərləndirərdiniz?
– Paris Böyük Dəbilqəsi mənim üçün yaxşı keçmədi. Uğursuz alındı. Bunun da öz səbəbləri var.

– Niyə uğursuz oldu? Səbəbləri nədir?
– Hardasa səhvlərim oldu və bu səhvlərin üzərində işləyib gələn yarışdan medalla qayıtmaq istəyirəm. Bu barədə məşqçilərlə məsləhətləşmələr aparıb öz üzərimdə işləyəcəyəm.

– Apreldə Tbilisidə Avropa çempionatı baş tutacaq. Hədəfləriniz varmı?
– Bəli, Avropa çempionatında hədəf var, amma hələ növbəti turnirlər barədə düşünürəm. İnşallah, əlimdən gələni edirəm ki, Avropa çempipnatına da düşüm.

– 66 kq-da Azərbaycan yığmasında ciddi rəqabət var. Əsas heyət üzvü olmaq çətin olmayacaq?
– Bəli, 66 kq çəki dərəcəsində rəqabətin yüksək olması danılmazdır. Bu əslində məni daha çox motivasiya edir. Əsas heyətə düşmək çətin olsa da, mən öz hazırlığıma və əzmkarlığıma inanıram. Məqsədim sadəcə komandada olmaq deyil, bu rəqabətdən qalib çıxaraq Azərbaycanı beynəlxalq arenalarda ən yüksək səviyyədə təmsil etməkdir.

Mahmud