Azərbaycan Gimnastika Federasiyasının (AGF) İcra(iyyə) Komitəsinə yeni üzv seçilən Vəfa Bəkərovanın kimliyi bilinib.

Prosport.Az-ın xəbərinə görə, V.Bəkərova "Ocaq Sport" bədii gimnastika klubunun direktorudur.

O, həmçinin beynəlxalq dərəcəli hakimdir. Ötən ilin 13-16 yanvar tarixlərində Bakıda “Bədii gimnastika üzrə beynəlxalq hakimlik kursları” keçirilib. Vəfa Bəkərova həm fərdi, həm də qrup hərəkətləri üzrə 2-ci kateqoriyalı hakim imtahanından uğurla keçib.

Xatırladaq ki, İcra Komitəsinin sədri federasiya prezidenti Mehriban Əliyeva, sədr müavini vitse-prezident Altay Həsənov və digər üzvləri Rauf Əliyevlə (millət vəkili, AFFA-nın sabiq I vitse-prezidenti) Rafiq Beybutovdur (Heydər Əliyev adına İdman-konsert Kompleksinin sabiq direktoru).

Qeyd edək ki, 2021-ci ilin yanvarın 25-də keçirilmiş AGF-nin 11-ci Ümumi Yığıncağında (Hesabat-Seçki Konfransı) sabiq gənclər və idman nazirinin müavini Mariana Vasileva İcra Komitəsinə üzv seçilmişdi. Onun ötən ilin yanvarında nazirlikdən uzaqlaşdırılmasından sonra bu vəzifə də boş qalmışdı.