Fransanın paytaxtı Parisdə keçirilən cüdo üzrə Böyük Dəbilqə seriyalı turnir başa çatdı. Azərbaycan komandası turniri 1 qızıl, 1 gümüş və 1 bürünc medalla başa vurdu. Komandanın heyətində Zelim Tçkayev yalnız final görüşündə məğlub olaraq gümüş medala sahib oldu. Finaladək irəliləməsi 26 yaşlı cüdoçuya 700 reytinq xalı qazandırdı və dünya reytinqində 3 pillə irəliləyərək 2-ci sıraya yüksəldi.
Prosport.Az son çıxışı münasibətlə Zelim Tçkayevdən müsahibə götürüb.
– 2026-cı ilin ilk Böyük Dəbilqə seriyalı turnirini gümüş medalla başa vurdunuz. Ümumi olaraq turnirdəki çıxışınızı necə qiymətləndirirsiniz?
– Gümüş medal qazandığım üçün çox şadam. Böyük Dəbilqə cüdoda ən nüfuzlu turnirlərdəndir. IJF seriyalı istənilən turnirdə qazanılan medal böyük uğurdur. Əlbəttə, qalib gəlmək istəyirdim. Amma təəsüf ki, alınmadı.
– Final qarşılaşmasından əvvəl 4 görüş keçirdiniz, çinli, britaniyalı, tacik və qazax rəqiblərinizə qalib gəldiniz. 1/4 finalda Abubakr Şerova və yarımfinalda Abılayxan Jubanazara yalnız qızıl xal bölümündə qalib gələ bildiniz. Həmin görüşlər niyə çətin alındı? Rəqiblər güclü idi, ya başqa səbəb var idi?
– Əslində bütün görüşlər çətin keçdi. Amma doğru vurğuladınız. Yarımfinal görüşü xüsusilə çox ağır keçdi. Əslində ideal formamı tam bərpa etməmişəm. Həm də açığı desəm, rəqib çox güclü idi. Ona görə də həmin görüşdə xeyli yoruldum.
– Finaldakı yaponiyalı rəbiqiniz, üçqat Asiya bürünc medalçısı Yuhei Oyno ilə daha əvvəl qarşılaşmamışdınız. Ona qalib gəlməyə nə maneə oldu?
– Maksimal formamda deyildim. Bu da finalda özünü göstərdi. Amma ümumi olaraq taktiki səhvlərə yol verdim. Ona görə də məğlub oldum.
– Taktiki səhv nədən ibarət idi?
– Ümumi götürsək, görüşün əvvəlindən taktiki səhvə yol verdim. Amma məşqçilər korpusu ilə birlikdə həmin səhvlərimizin üstündə işləyəcəyik. Gələn səfər revanş götürməyə çalışacağam.
– Ötən il Avropa və dünya çempionatından bürünc medalla ayrıldınız. Apreldə qonşu ölkə olan Gürcüstandakı qitə çempionatında minimum hədəfiniz nədir?
– Bu il, düzünü desəm, daha yüksək nəticələrə fokuslanmışam. Avropa və dünya çempionatında qızıl medalı hədəfləyirəm. Ümid edirəm ki, alınacaq.
– 81 kq çəki dərəcəsində hazırda komandanın lideri hesab olunursunüz. 100 kq-da həmyerliniz Zelim Kotsoyev, gənclər arasında isə 90 kq-da Aslan Kotsoyev komandanın lideriləridir. Komandada 3 osetin çıxış edir. Şimali Osetiyada Azərbaycan komandasının çıxışı necə izlənilir?
– Bəli, çox doğru qeyd etdiniz. Osetiyadan bizə daim dəstək hiss olunur. Ümumiyyətlə, Osetiyada cüdoya maraq var və tək bizlərə yox, bütün Azərbaycan komadasına azarkeşlik edirlər. Düşünürəm ki, təkcə cüdoda yox, digər idman növlərində də Azərbaycan təmsilçilərinə azarkeşlik edirlər.
Mahmud
