"Şəki" basketbol klubunun türkiyəli oyunçusu Dorukhan Kuzu müsahibə verib.

Prosport.Az klubun mətbuat xidmətinə verdiyi müsahibəni təqdim edir:

– Basketbola necə gəlmisiniz?
– Basketbola 8 yaşında başlamışam. Əvvəl basketbolu oynayanda, peşəkar formada davam etmək kimi məqsədim yox idi. Sadəcə, bunu hobbi olaraq görürdüm. Amma 16-17 yaşımdan etibarən özümə bir hədəf qoydum və hazırda da o yolda davam edirəm.

– Komandanın baş məşqçisi də türkiyəlidir. Bedri Meriçlə əvvəlcədən tanışlığınız vardı?
– Bedri abi ilə bu yay tanış olduq. Mənə inandı və şans vermək istədiyini söylədi. Onunla yaxşı münasibətimiz var. Bir çox şeyi ondan öyrənirəm və bir gənc oyunçu kimi ona çox hörmət edirəm. Bedri abi ilə çalışdığım üçün özümü şanslı hesab edirəm.

– Türkiyədən Azərbaycan çempionatında oyunçular və məşqçilər çıxış edir. Onlardan kimisə tanıyırdınız?
– Yox. Hamısını Azərbaycana gəlib rəqib olduqdan sonra tanımışam.

– Şəkidə yaşamaq barədə nə deyə bilərsiniz?
– Mən Türkiyənin paytaxtı Ankarada yaşamışam. Paytaxtdan sonra Şəkidə yaşamaq bir az çətindir. Amma Şəki kiçik şəhərdir və buranı da sevməyə başlamışam. Çünki bu şəhərdə oynamaq mənim işimə və inkişaf etməyimə fokuslanmağıma kömək edir.

– Azərbaycan Basketbol Liqası barədə hansı fikirdəsiniz?
– Azərbaycan çempionatı rəqabətli bir liqadır və biz də məqsədlərimiz üçün çalışırıq. Müntəzəm mövsümdə son dövrə oyunlarına hazırıq. Mövsümü ən yaxşı şəkildə keçirəcəyimizə və məqsədimizə çatacağımıza əminəm.