"Neftçi"nin sabiq qapıçısı Vladimir Miçoviçin Bakıya gəlişinin səbəbi bəlli olub.

Prosport.Az serbiyalı futbol veteranının dekabrda Bakıda olmasının səbəbini özündən öyrənib.

Məlum olub ki, 50 yaşlı mütəxəssis artıq futbol sahəsində deyil, avtomobil idmanı sahəsində fəaliyyət göstərir. Belə ki, o, Serbiyada yaşayan, Azərbaycanla bağlılığı olan pilot tapıb.

Özünü dinləyək: "Moskvada doğulmuş Kirill Kutskov adlı pilot var. O, Moskvada doğulsa da, hazırda Serbiyanın paytaxtı Belqradda yaşayır. 17 yaşı var. 3 il əvvəl İtaliyada 14 yaşlılar arasında kartinq üzrə dünya çempionu olub. Ötən il "Formula 4" yarışında çıxış edirdi. Bu ildən "Formula 3" yarışında iştirak etməyə başlayacaq.

O, 2023-cü ildə çempion olduğu üçün həmin ilin dekabrında FIA-nın (Beynəlxalq Avtomobil Federasiyası) Bakıda keçirilmiş qala gecəsində mükafatlandırılıb. Ona kuboku "Red Bull"un dünya çempionu Maks Ferstapen vermişdi. 

Kirillin baba tərəfdən əsli Azərbaycana gedib çıxır. İndi mən istəyirəm ki, bu pilotun Azərbaycan adından lisenziya almasını təmin edim. Dekabrda bəzi şəxslərlə görüşdüm. Bilirəm ki, Azərbaycan tərəfi də ölkə adından çıxış edəcək pilotunun olmasında maraqlıdır. Bu səbəbdən bu ay yenidən Bakıya dönməliyəm".

Onu da bildirək ki, Kirill Kutskov 2023-cü ildən "Formula 4" (F4) yarışlarına qatılır. O, 2024-cü ildə ərəb ölkələrində keçirilən "F4 Saudi Arabian Championship"də bürünc medal, həmin il Mərkəzi Avropada baş tutan "Formula 4 CEZ Championship"də gümüş medal qazanıb. Ötən il isə "Formula 4 CEZ Championship"in 3 mərhələsinin və "SMP F4 Championship"in 2 mərhələsinin qalibi olub.

Rusiyaya qadağa qoyulduğundan, ailəsi Serbiyaya köçüb və o ölkənin lisenziyası ilə beynəlxalq yarışlara qatılmaq istənilib. Lakin bu, baş tutmayıb. Belə ki, 2 il əvvəl onun atası Yevgeni Kutskov Rusiyanın "Çempionat" nəşrinə müsahibəsində oğlu Kirill və Daniilin Serbiyanın "Çrvena Zvezda" komandasının üzvləri olduğunu, lakin həmin klubun rəhbəri lisenziyanın rəsmiləşməsi üçün onlardan 3 min əvəzinə 6 min avro istəməsindən şikayətlənib. Bu səbəbdən Kirill hazırda pulsuz olan Qırğızıstan lisenziyası ilə çıxış edir.

Qeyd edək ki, Vladimir Miçoviç 2005-2010-cu illərdə "Neftçi"nin şərəfini qoruyub. 2010/11-ci ildə isə I Liqa klubu "Abşeron"da oynayan məşqçi olub və orada karyerasını bitirib. Daha doğrusu, klub fəaliyyətini dayandırıb. Daha sonra Miçoviç 2014-cü ilin mayından "Neftçi"də qapıçılar üzrə məşqçi işləyib.

Səbuhi Musa