“Gəncə”nin ABŞ-li basketbolçusu Delano Spenser klubun mətbuat xidmətinə müsahibə verib. 

Prosport.Az həmin müsahibəni təqdim edir:

- Delano, “Sabah” ilə oyundan başlayaq. Bu matç haqqında nə deyə bilərsiniz?
- Əvvəlcə rəqibi qələbə münasibətilə təbrik edirəm. Onlar güclü komandadırlar və bunu göstərdilər. Oyunun 1-ci hissəsində meydanda mübarizə apara, müqavimət göstərə bildik, fasilədən sonra konsentrasiyamızı itirdik və düşündüklərimizi yerinə yetirmədik. Bunlar “Sabah” kimi rəqiblərə qarşı gənc bir komanda olaraq öyrənə biləcəyimiz şeylərdir. Belə ki, bütün 40 dəqiqə ərzində tam konsentrasiyaya və qətiyyətə sahib olmalısınız.

- Siz oyunda özünüzü ən yaxşı tərəfdən göstərib 27 xal toplamaqla 5 assist və 4 ribaund etdiniz...
- Mənim üçün şəxsi göstəricilər yox, komanda önəmlidir. Bütün diqqətimi komandanın qalib gəlməsi üçün nə lazımdırsa, etməyə yönəltmişəm. Məşqçilər və oyunçu yoldaşlarım daha çox xal toplamaq üçün mənə imkanlar yaratdılar. “Gəncə”nin qələbəsi üçün bütün fədakarlıqlara hazıram. İstəyirəm əvvəlki oyunlarda olduğu kimi, çoxlu sayda assist və ribaundlar edim. 

- Sıx qrafiklə 2 oyun keçirəcəksiniz. Nə düşünürsünüz? 
- Bizi vacib matçlar gözləyir. Hər iki oyunda qalib gəlib gücümüzü göstərməliyik. Yaxşı rəqabətədavamlı komandamız var və bilirik ki, liqada ən yaxşı kollektivlərdən biriyik. Uğur qazanmağa köklənmişik. Meydana qalib gəlmək üçün çıxacağıq. Bütün diqqətimiz buna yönəlib.

- Sizcə, komanda hədəfə çata biləcək? 
- Bəli, biz hər 2 görüşdə qələbə qazanmaq gücündəyik. Bununla azarkeşlərimizə müsbət enerji ötürə bilərik. Onlar buna layiqdirlər. Azarkeşlər bizi evdə və səfərdə dəstəkləyirlər. İstəyirik ki, Gəncə bizimlə fəxr etsin.