Dünyanın 2 nömrəli tennisçisi Novak Cokoviç avqustun 7-dən 13-dək Torontoda keçiriləcək turnirdə iştirakdan imtina edib. Buna səbəb kimi o, yorğunluğu göstərib.

Prosport.Az xəbər verir ki, onun yerinə turnirin əsas hissəsində amerikalı Kristofer Yubenks çıxış edəcək. Dünyanın 31-ci tennisçisi son “Uimbldon” turnirinin ¼ finalına qədər irəliləyə bilmişdi. Daha bir tennisçi imtina edərsə, turnirdə niderlandlı Botik van de Zandsxulp iştirak edəcək. Onun da adı ehtiyat tennisçilər sırasında var.

Xatırladaq ki, Novak Cokoviç bu il 3 titul qazanıb. Avstraliya və Fransada “Böyük dəbilqə” turnirlərində çempion olan serb idmançı “Uimbldon”un finalında Karlos Alkarasa məğlub olub.

Toronto yarışı “Masters” seriyalı turnirdir. Çempionluğa görə idmançının reytinqinə 1000 bal əlavə edilir.