"2022-ci ildə Bakıda ilk dəfə olaraq paracüdo üzrə dünya çempionatı keçirilib. Təşkilatçılıq və yarışın səviyyəsi baxımından Bakıda keçirilmiş dünya çempionatı əvvəlki bu tip yarışlar arasında ən uğurlu hesab edilir. Bunu nəzərə alaraq IBSA qərara alıb ki, 2023-cü ildə də şəhərimizdə paracüdo üzrə Qran Pri keçirilsin".
Prosport.Az-a verilən məlumata görə, bunu Beynəlxalq Görmə Məhdudiyyətli İdmançılar Assosiasiyasının prezidenti İlqar Rəhimov bildirib.
Milli Paralimpiya Komitəsinin sabiq rəhbəri bildirib ki, yarış ilk dəfə Bakı Gimnastika Arenasında keçiriləcək:
"Yarışın ən vacib məqamı da odur ki, IBSA qərarına görə qaliblərə dünya çempionatı səviyyəsində reytinq xalları veriləcək. Bu amil gözlənilən yarışa dünya ölkələri arasında marağı xeyli artırıb. Yarış bu ilin sentyabr ayının 26-27 tarixlərində baş tutacaq. Artıq Bakı Qran Prisinin Təşkilat Komitəsi bir necə müddətdir ki, öz fəaliyyətinə başlayıb və tədbirlər planına uyğun olaraq bir cox işləri görüb. Yarış Milli Gimnastika Arenasında baş tutacaq və cüdo üzrə "Böyük Dəbilqə" yarışından dərhal sonra başlayacaq".
O bildirib ki, tibbi təsnifat komandaların qalacağı "Badamdar Baku" hotelində aparılacaq:
"Bildiyiniz kimi, IBSA-nın qaydalarına uyğun olaraq yarış önçəsi idmançıların tibbi təsnifatdan keçirilməsi də nəzərdə tutulur və bu tədbirin də həmin hoteldə təşkil olunması qərara alınıb. Bu məqsəd ilə ayrılmış xüsusi otaqda müvafiq tibbi avadanlıqlar quraşdırılacaq. Dünyanin müxtəlif ölkələrindən gəlmış 4 tibbi təsnifatçı 2 paneldə öz işlərini quracaq. Yeri gəlmişkən, mən “Batıgöz” klinikasına bu işdə bizə dəstək olduqlarına görə təşəkkürümü bildirirəm.
Qeyd etdiyim kimi, yarış 2 gün davam edəcək. Yarışda hakimliyi Beynəlxalq Cüdo Federasiyasının (IJF) beynəlxalq hakimləri həyata keçirəcək. Buna gorə və digər köməkliklərə görə mən Beynəlxalq Cüdo Federasiyasının prezidenti Marius Vizerə öz təşəkkürümü bildirirəm. IJF ilə IBSA arasında cox yaxın əməkdaşlıq əlaqələri mövcuddur. Bakı Qran Prisində bu təşkilatlar arasında yeni əməkdaşlıq və partnyorluq Memorandumunun imzalanması planlaşdırılır. Yarışa qayıtdıqda, qeyd etmək istəyirəm ki, artıq dünyanin 41 ölkəsi yarışda iştirakını təsdiq edib. Bu ölkələrdən gələn idmançıların sayı 250 nəfər təxmin edilir. Yarışın təşkilində bizə köməklik edən bir çox təşkilatlar və özəl qurumlar var. Mən Gənclər və İdman, Əmək və Əhalinin Sosial Müdafiəsi nazirliklərini qeyd etmək istəyirəm. Eyni zamanda Azərbaycan Cüdo Federasiyasına, Milli Paralimpiya Komitəsinin rəhbərliyinə, Bakı Nəqliyyat Agentliyinə dəstəklərinə görə təşəkkür edirəm".