21 yaşadək futbolçulardan ibarət Azərbaycan millisinin (U-21) baş məşqçisi Rəşad Eyyubov Bakının Mərdəkan qəsəbəsində yerləşən Milli Komandaların Təlim-Məşq Mərkəzində jurnalistlərin suallarını cavablandırıb.
Prosport.Az-ın da iştirak etdiyi həmin müsahibəni təqdim edirik:
– Ümumilikdə U-21-in təlim-məşq toplanışı necə keçir?
– Hər şey yaxşıdır. Oyunçularla daha yaxından tanış olmaq üçün yaxşı fürsət yarandı. Əksəriyyətini izləyirdik, amma şəxsi təcrübə həmişə fərqli olur. Bizim üçün çox önəmli bir toplanışdır.
– Almaniyanın "Herta" klubundan 2 futbolçu milliyə cəlb olunub. Onların səviyyəsi sizi nə dərəcədə qane edir?
– Onları çoxdan izləyirdik. Onlarla bağlı bütün statistik rəqəmlər bizdə var. Yenə də bizim üçün şəxsi təcrübə çox vacibdir. Bu futbolçulara yaxından baxmaq lazımdır.. Onların səviyyəsindən şübhəmiz yoxdur, çünki yaxşı klublarda çıxış edirlər. Demək olar ki, bütün oyunlarına baxmışıq. Elyas Bağcı U-19 liqasında oynayır, bəzən U-21-ə cəlb olunur. Raul Süleymanov artıq U-17 liqasında çıxış edir. Son oyunlarından razı qaldıq və düşündük ki, bu toplanış onları meydanda görmək üçün yaxşı bir fürsətdir.
– Raul Süleymanov Almaniyada doğulub?
– Bəli.
– U-21-in heyətində “Səbail”in oyunçusu Emin Rüstəmovun əvəzinə “Qəbələ”nin üzvü Ceyhun Bağırzadə çağırıldı. Bu dəyişiklik zədə ilə bağlı idi?
– Yox. Düşündük ki, Emin Rüstəmovun indiki halda klubunda qalması onun da, bizim üçün də daha önəmlidir.
– Bir müddət U-21 millisində Ayxan Abbasovun köməkçisi də işlədiniz. Sizin oyun fəlsəfəniz Ayxan Abbasovunkuna sadiqdir, yoxsa fərqlidir?
– Mən lap istəsəm belə, kiminsə sistemini kopyalamaq çox çətin bir işdir. Çünki Ayxan müəllim oyunu beynində necə görürdüsə, mən bunu görə bilmərəm. Hər bir məşqçi fərqlidir. Əsas məqsəd odur ki, oyunçuların müsbət xüsusiyyətlərindən meydanda maksimum və effektli istifadə edək. Sistem 4-4-2 də ola bilər, 5-4-1 də, amma bu çox da önəmli deyil. Əsas prinsiplər və oyunçuların keyfiyyətidir.
– Martda Portuqaliya və Bolqarıstanla oyunlarınız olacaq. Toplanış isə Bakıda keçirilir. Xaricdə hazırlaşmaq üçün təklif irəli sürdünüzmü?
– Burada şərait, meydança yaxşıdır. Ona görə də toplanışı burada keçirmək qərarı verdik.
– Qara Qarayevin U-21-ə analitik kimi təyinatı ilə bağlı nə deyə bilərsiniz?
– İlk növbədə Qaranı təbrik etmək istəyirəm. Çox yaxşı karyerası olub. Ölkədə belə karyeraya malik 3-4 oyunçu var. Düşünürəm və inanıram ki, Qara Qarayev həm məşqçi, həm də insan kimi bizə uğur gətirəcək.
Səbuhi Musa