“Gözün aydın olsun”, “Neftçi” fanı. Çox sevdiyin klub səni TV-dən də məhrum etdi.
Audiovizual Şura "Neftçi Media" MMC-yə verilən peyk yayımı həyata keçirməyən platforma yayımçısı lisenziyasını ləğv etdi. Səbəb son 1 il ərzində davamlı internet üzərindən yayımın olmamasıdır.
Əvvəla, onu izah edək ki, “peyk yayımı həyata keçirməyən platforma yayımçısı lisenziyası” nə deməkdir? Hamının başa düşə biləcəyi dildə yazsam, “peyk yayımı həyata keçirməyən platforma yayımçısı lisenziyası” kabel televiziyalarına çıxış imkanı verən lisenziyadır. Məsələn, kanal var ki, peyk yayımı yoxdur, amma KATV, Connect TV, CityNet kimi platformalarda izlənilə bilir.
Bəs bu lisenziya nə vaxt alınmışdı? 2023-cü ilin sonlarında. Bu, Rüstəm Allahverdiyevin mətbuat xidmətinin rəhbəri olduğu vaxt idi. Daha sonra Rüstəmlə yollar dekabrda ayrıldı, iş yarımçıq qaldı, Kamran Ağabalayev TV-yə direktor təyin olundu, ancaq yenə kabel televiziyalarına çıxış baş tutmadı. Daha sonra Ağabalayev də klubdan ayrılaraq ağ-qara sevgisini “Baku TV”yə daşıdı, ayrılmasını da xaricdə olması, film və ssenarilər üzərində işləməsi ilə əlaqələndirdi. Hərçənd indiyədək həmin filmlərə Azərbaycan filmlərini diqqətlə izləyən biri kimi heç bir platformada rast gəlmədim.
Daha sonra indikilər gəldi. TV təcrübəsi olan 2 həmkar – Rüstəm Əfsərli və Asəf Zeynallı klubun mətbuat işinə gətirildi. Gözləmək olardı ki, “Neftçi TV” qeyri-adi islahatları, fərqlilikləri, interaktiv mövzuları ilə gündəmə gələcək. Ancaq onlar da TV-nin inkişafı üçün heç nə edə bilmədi. Klub rəhbərliyi Cenk Sümərlərə və əcnəbilərə pulu tökdü, ancaq televiziya işi arxaya atıldı.
Bu isə o deməkdir ki, indikilər də klub rəhbərliyinə TV və sosial medianın inkişafı yönündə söz bildirmək üçün ya cəsarətli deyil, ya da klub rəhbərliyi onları heçə sayır. Əgər 2-ci variantdırsa, görünür, onlar üçün klubun media işi yox, nəticə önəmlidir. Nəticə isə göz qabağındadır, futbolçular, məşqçilər yola salınır, təzminatlar ödənilir, pullar lazımsız yerlərə axıdılır. Klub isə Audioviziual Şuradan hər hansısa cərimə almamaq üçün (bir neçə dəfə xəbərdarlıq alıb) özü müraciət edib deyir ki, lisenziyamızı ləğv edin, onsuz da bizə kabel yayımına çıxmaq vacib deyil...
Pandemiyanın qızmar vaxtında – 2020-ci ildə, Kamran Quliyevin klubda prezident olduğu vaxt yaradılan “Neftçi TV” üçün Rüstəm Allahverdiyevdən aldığım açıqlama indiyədək yadımdadır. Təxminən 5 il əvvəl alınmış açıqlamaya diqqət: “YouTube” vasitəsilə yayımlar ilk günlərdə 4-5 saat davam edəcək. Daha sonra bu müddəti 8 saata çatdıracağıq. “YouTube”da efirimiz tam hazır olduqdan sonra isə KABEL TELEVİZİYASINA ÇIXMAQ BARƏDƏ DÜŞÜNƏCƏYİK”.
Başın sağ olsun, Rüstəm. Övladın kimi sevdiyin, lisenziya aldığın “Neftçi TV” kimlərinsə güdazına getdi...
P.S. Məndə olan məlumata görə, TV xərclərini köklü surətdə azaldan klub BƏƏ-dəki yoxlama oyunlarının heç birini canlı yayımlamayacaq. Klubun adından sonra gələn PFK-da P hərfinin məsuliyyətini dərk etmək lazımdır, cənablar!
Səbuhi Musa