2025-ci il arxada qaldı. Ötən il Azərbaycan idmançıları bir sıra yarışlardan medallarla qayıtdı. Bir sıra federasiyalar uğurlu çıxış etsələr də, uğursuzluğunu davam etdirənlər də oldu.
Prosport.Az ötən il keçirilmiş olimpiya idman növləri üzrə dünya və Avropa çempionatlarında qazandığımız medallara nəzər salıb.
Bu yarışlarda 40 medal qazanmışıq. Bunlardan 6-sı qızıl, 8-i gümüş və 26-sı bürünc medaldır. Qızıl medallardan 4-ü güləş üzrə Avropa çempionatında, 1-i güləş üzrə dünya çempionatında və 1-i batut gimnastikası üzrə dünya çempionatında (qeyri-olimpiya növü olan tamblinqdə komanda yarışında dünya çempionu olmuşuq) qeydə alınıb.
Mötəbər yarışlara qatılan federasiyalardan Atletika, Badminton, Avarçəkmə və Kanoe, Qılıncoynatma, Üzgüçülük və Kamandan Oxatma Federasiyaları bu yarışlardan medal gətirə bilməyib.
6-9 mart. Atletika üzrə qapalı məkanda Avropa çempionatı (Apeldorn, Niderland) – 1 idmançı ilə yarışdıq, medal olmadı
7-13 mart. 10 metr məsafədən güllə atıcılığı üzrə Avropa çempionatı (Osiyek, Xorvatiya) – 1 bürünc medalla ümumi sıralamada 18-ci, medal qazandığımız "Çelenc" sıralamasında 9-cu olduq
7-13 aprel. Güləş üzrə Avropa çempionatı (Bratislava, Slovakiya) – 24 idmançı ilə yarışdıq, 4 qızıl, 2 gümüş, 7 bürünc medalla Rusiya və Belarus idmançılarının birgə çıxış etdiyi UWW-dən sonra 2-ci olsaq da, onların nəticələri sıralamada yer almadığından, 1-ci sayıldıq
8-13 aprel. Badminton üzrə Avropa çempionatı (Horsens, Danimarka) – 6 idmançı ilə yarışdıq, medal olmadı
13-21 aprel. Ağırlıqqaldırma üzrə Avropa çempionatı (Kişinyov, Moldova) – 1 idmançı ilə yarışdıq, ümumi sıralamada 1 gümüş medalla, eləcə də "böyük" və "kiçik" medal sıralamasında isə 1 qızıl, 1 gümüş, 1 bürünc medalla 15-ci olduq
23-27 aprel. Cüdo üzrə Avropa çempionatı (Podqoritsa, Monteneqro) – 15 idmançı ilə yarışdıq, 1 gümüş, 4 bürünc medalla 10-cu olduq
26-31 may. İdman gimnastikası üzrə Avropa çempionatı (Laypsiq, Almaniya) – 6 idmançı ilə yarışdıq, medal olmadı
29 may – 1 iyun. Akademik avarçəkmə üzrə Avropa çempionatı (Plovdiv, Bolqarıstan) – 4 idmançı ilə yarışdıq, medal olmadı
4-8 iyun. Bədii gimnastika üzrə Avropa çempionatı (Tallin, Estoniya) – 14 idmançı ilə yarışdıq, medal olmadı
13-20 iyun. Cüdo üzrə dünya çempionatı (Budapeşt, Macarıstan) – 13 idmançı ilə yarışdıq, 3 bürünc medalla 14-cü olduq
14-19 iyun. Qılıncoynatma üzrə Avropa çempionatı (Cenova, İtaliya) – 4 idmançı ilə yarışdıq, medal olmadı
11 iyul – 3 avqust. Su idman növləri üzrə dünya çempionatı (Sinqapur, Sinqapur) – 2 idmançı ilə yarışdıq, medal olmadı
20-30 iyul. Qılıncoynatma üzrə dünya çempionatı (Tbilisi, Gürcüstan) – 8 idmançı ilə yarışdıq, medal olmadı
23 iyul – 7 avqust. 25, 50, 300 metr məsafədən güllə və stend atıcılığı üzrə Avropa çempionatı (Şatoru, Fransa) – 1 gümüş, 2 bürünc medalla 27-ci olduq
20-24 avqust. Kanoe və kayak üzrə dünya çempionatı (Milan, İtaliya) – 2 idmançı ilə yarışdıq, medal olmadı
20-24 avqust. Bədii gimnastika üzrə dünya çempionatı (Rio-de-Janeyro, Braziliya) – 7 idmançı ilə yarışdıq, medal olmadı
25-31 avqust. Badminton üzrə dünya çempionatı (Paris, Fransa) – 6 idmançı ilə yarışdıq, medal olmadı
4-14 sentyabr. Boks üzrə dünya çempionatı (Liverpul, İngiltərə) – 11 idmançı ilə yarışdıq, 2 bürünc medalla 19-cu olduq
5-12 sentyabr. Kamandan oxatma üzrə dünya çempionatı (Kuancu, Cənubi Koreya) – 2 idmançı ilə yarışdıq, medal olmadı
13-21 sentyabr. Güləş üzrə dünya çempionatı (Zaqreb, Xorvatiya) – 23 idmançı ilə yarışdıq, 1 qızıl, 2 gümüş, 5 bürünc medalla Rusiya və Belarus idmançılarının birgə çıxış etdiyi UWW-dən sonra 6-cı olsaq da, onların nəticələri sıralamada yer almadığından, 5-ci sayıldıq
13-21 sentyabr. Atletika üzrə dünya çempionatı (Tokio, Yaponiya) – 1 idmançı ilə yarışdıq, medal olmadı
2-11 oktyabr. Ağırlıqqaldırma üzrə dünya çempionatı (Förde, Norveç) – 4 idmançı ilə yarışdıq, medal olmadı
8-19 oktyabr. Stend atıcılığı üzrə dünya çempionatı (Afina, Yunanıstan) – 9 idmançı ilə yarışdıq, medal olmadı
19-25 oktyabr. İdman gimnastikası üzrə dünya çempionatı (Cakarta, İndoneziya) – 4 idmançı ilə yarışdıq, medal olmadı
24-30 oktyabr. Taekvondo üzrə dünya çempionatı (Usi, Çin) – 9 idmançı ilə yarışdıq, 1 bürünc medalla 20-ci olduq
5-9 noyabr. Batut gimnastikası üzrə dünya çempionatı (Pamplona, İspaniya) – 6 idmançı ilə yarışdıq, 1 qızıl, 1 bürünc medalla Rusiya və Belarus idmançılarının birgə çıxış etdiyi INA-dan sonra 7-ci olsaq da, onların nəticələri sıralamada yer almadığından, 6-cı sayıldıq
6-18 noyabr. Güllə atıcılığı üzrə dünya çempionatı (Qahirə, Misir) – 3 idmançı ilə yarışdıq, 1 gümüş medalla 15-ci olduq
Bundan başqa, boksda Beynəlxalq Olimpiya Komitəsinin tanımadığı IBA (Beynəlxalq Boks Assosiasiyası) tərəfindən keçirilən 2 dünya çempionatında da yarışmışıq:
9-16 mart. Qadın boksu üzrə dünya çempionatı (Niş, Serbiya) – 6 idmançı ilə yarışdıq, medal olmadı
4-13 dekabr. Kişi boksu üzrə dünya çempionatı (Dubay, BƏƏ) – 11 idmançı ilə yarışdıq, 1 qızıl, 2 bürünc medalla 4-cü olduq
Həmçinin, Azərbaycan ötən il bir sıra multiidman yarışlarında da iştirak edib. Nəticələr belədir:
9-16 fevral. XVII Avropa Yeniyetmələr Qış Olimpiya Festivalı (Bakuriani, Gürcüstan) – 1 idmançı ilə yarışdıq, medal olmadı
4-14 aprel. III U-15 Ümumdünya Məktəb Yay Oyunları/Gimnaziada (Zlatibor, Serbiya) – 191 idmançı ilə yarışdıq, 33 qızıl, 23 gümüş, 28 bürünc medalla 4-cü olduq
16-27 iyul. XXXII Yay Dünya Universitet Oyunları (Reyn-Rur, Almaniya) – 71 idmançı ilə yarışdıq, 2 qızıl, 2 gümüş medalla 24-cü olduq
20-26 iyul. XVIII Avropa Yeniyetmələr Yay Olimpiya Festivalı (Skopye, Şimali Makedoniya) – 52 idmançı ilə yarışdıq, 3 qızıl, 3 gümüş, 4 bürünc medalla 16-cı olduq
28 sentyabr - 8 oktyabr. III MDB Oyunları (GƏNCƏ, AZƏRBAYCAN) – 340 idmançı ilə yarışdıq, 33 qızıl, 56 gümüş, 95 bürünc medalla 2-ci olduq
7-21 noyabr. VI İslam Həmrəylik Oyunları (Ər-Riyad, Səudiyyə Ərəbistanı) – 179 idmançı ilə yarışdıq, 9 qızıl, 19 gümüş, 31 bürünc medalla 10-cu olduq.
Səbuhi Musa