2025-ci il arxada qalır. Bu il Azərbaycan cüdoçuları bir sıra beynəlxalq turnirlərdə, dünya və Avropa çempionatlarında medallara sahib olublar. Onlardan biri də Bratislavada gənclər arasında Avropa çempionu olan 18 yaşlı Nihad Məmişovdur.
Prosport.Az bu münasibətlə Nihad Məmişovdan müsahibə götürüb.
- İl ərzində Poznan, İstanbul, Berlin və Skopyedə Avropa Kuboku turnirlərində medallara sahib oldunuz. Ardınca Bratislavada gənclər arasında Avropa çempionatının qalibi oldunuz. 2025-ci ili necə dəyərləndirərdiniz?
- Allaha şükürlər olsun, 2025-ci il mənim üçün qənaətbəxş oldu. Gənclərin dünya çempionatında da medal qazanmalı idim. Amma alınmadı. İnşallah, 2026-cı ildə alınar.
- Ötən il Limada yeniyetmələrin dünya çempionatında 1-ci yeri tutdunuz. Bu dəfə isə eyni şəhərdə gənclər arasında mundialda medalsız qaldınız...
- Mən son dünya çempionatında çox həvəsli idim ve ilk dəfə idi ki, gənclər arasında çıxış edirdim. Ona görə də müəyyən qədər həyəcan var idi. Çıxışım yaxşı idi. Yaxşı start götürmüşdüm. Amma yaponiyalı cüdoçu ilə qızğın mübarizədə bir səhvlə məğlub oldum. Halbuki qalib gələ bilərdim. Təəsüf ki, alınmadı.
- 60 kq çəki dərəcəsində mübarizə aparırsınız. Gənclər arasında dünya reytinqində hazırda 9-cu pillədəsiniz. Gələn ildən böyüklərin turnirlərində çıxış edəcəksiniz?
- Bəli. Amma yeni ilə yeni çəki dərəcəsində - 66 kq-da başlayacağam. Bu çəki dərəcəsində reytinqim yoxdur. Amma daha yaxşı nailiyyətlər verəcəyimə inanıram.
- Los-Anceles Yay Olimpiya Oyunlarına 3 ildən də az bir zaman qalır. Komandada 60 kiloqram çəki dərəcəsində aparıcı cüdoçu Balabəy Ağayevdir. Sonuncu olimpiadada da o çıxış etdi. Olimpiya Oyunları ilə bağlı hədəfləriniz var mı?
- Bəli. Əsas hədəfim 2028-ci il olimpidasıdır. Orada iştirak etmək üçün 3 il ərzində dayanmadan məşq etməliyəm. Azərbaycanı Los-Ancelesdə layiqincə təmsil etməyi arzulayıram.
- Ümumi olaraq, gələn il üçün əsas hədəfləriniz nədir?
- 2026-cı il çox çətin olacaq. Bakıda böyüklər arasında dünya çempionatı var. Həm də əsas hədəfim gənclər arasında dünya çempionluğudur. Ümid edirəm ki, uğurlu bir il olacaq.