2025-ci il arxada qalır. Bu il Azərbaycan cüdoçuları bir sıra beynəlxalq turnirlərdə, dünya və Avropa çempionatlarında medallara sahib oldular. Onlardan biri də Slovakiyanın paytaxtı Bratislavada gənclər arasında Avropa çempionu, Perunun Lima şəhərində isə dünya ikincisi olan 19 yaşlı Məhəmməd Musayevdir.
Prosport.Az bu münasibətlə Məhəmməd Musayevdən müsahibə götürüb.
- 2025-ci il arxada qalır. İl ərzində gənclər arasında Avropa Kuboku turnirlərində bir dəst medala (qızıl, gümüş və bürünc) sahib oldunuz. Bratislavada gənclər arasında Avropa çempionu oldunuz. Limada isə gənclərin dünya çempionatını gümüş medalla tamamladınız. Ümumi olaraq 2025-ci ili necə dəyərləndirirsiniz?
- 2025-ci il mənim üçün uğurlu sayıla bilər. Çıxış etdiyim bütün yarışlardan medalla qayıtdım. Bu il mənə çox düşərli oldu. Əziyyətimiz yerdə qalmadı. Fürsətdən istifadə edib, bizə göstərilən dəstəyə görə Azərbaycan Cüdo Federasiyasına, şəxsi məşqçim Hikmət Əliyevə və gənclərdən ibarət yığmanın baş məşqçisi Rüstəm Alimliyə təşəkkürlərimi bildirmək istəyirəm.
- Gənclərdən ibarət Azərbaycan yığmasının 2025-ci il ərzində ümumi çıxışını necə qiymətləndirirsiniz? Avropa çempionatında komandaya 2 qızıl medaldan 1-ni də, dünya çempionatında isə yeganə mükafatı siz gətirdiniz. Komanda yoldaşlarınızın çıxışını aşağı qiymətləndirirsinizmi?
- Bu suala cavab verməməyim doğru olmaz. Çünki hər kəsin qisməti özünədir.
- 66 kq çəki dərəcəsində mübarizə aparırsınız. Gənclərin dünya reytinq cədvəlində hazırda 3-cü pillədəsiniz. Bu çəki dərəcəsi üzrə böyüklərin komandasında aparıcı idmançı yoxdur. Gələn ildən əsas komandaya düşmək şanslarınız varmı?
- Bəli, əlbəttə. Məqsədim əsas komandada çıxış etməkdir. Çünki əsas komandada çıxış etdiyimiz zaman dünya çempionatına, oradan isə olimpiadaya yol daha açıq olur. Bu yol da çox çətin, enişli-yoxuşludur.
- Los-Anceles Olimpiadasına 3 ildən də az bir zaman qalır. Olimpiada üçün hədəfləriniz var mı?
- İdmançının 1-ci məqsədi elə olimpiadadan medalla qayıtmaqdır. Mənim də birinci məqsədim və arzum odur. Özümə inanıram və bunun üçün çalışacağam.
- Gələn ilin əsas turnirləri - Tbilisidə Avropa çempionatı, Bakıda isə dünya çempionatı olacaq. Ümumi olaraq gələn il üçün əsas hədəfləriniz nədir?
- Əsas hədəflərdən biri 2026-cı ildə gənclər arasında medal qazanıb, daha sonra Bakıda baş tutacaq dünya çempionatında çııxış etməkdir. İnsanın öz vətənində belə böyük bir yarışda çıxış edib medal qazanmağı onun üçün çox vacib və qürurvericidir.
Mahmud