Azərbaycanlı futbolçu Murad Vəliyev Estoniyanın “Narva Trans” klubu ilə mövsümün sonunadək müqavilə bağlayıb. 23 yaşlı yarımmüdafiəçinin son komandası “Şamaxı” olub.

Msport.az Vəliyevin Estoniya klubunun rəsmi saytına verdiyi müsahibəni təqdim edir:

- Əvvəlcə dəqiqləşdirək, necə düzdür, Veliyev, yoxsa Valiyev? 

- Estoniyada Veliyev, pasportda da məhz belə yazılıb. Vəliyev isə Azərbaycan variantıdır. Azərbaycan dilində "a" hərfinin qarşılığı olan hərf (ə nəzərdə tutulur-red.) var, amma "o" "e" kimi oxunur. Ona görə də belə fərq yaranır.

- Estoniyanın yeniyetmələrdən ibarət millisində oynasan da, sonradan Azərbaycanın gənclər yığmasının formasını geyinmisən. Əgər A milli komandalar səviyyəsində təklif gəlsə, hansını seçərsən?

- Düzünü desəm,  əvvəl fikrim daha çox Azərbaycan barədə idi, ötən il də müsahibəmdə bunu demişdim. İndi bu haqda düşünməməyə çalışıram. Əgər konkret maraq olsa, o zaman vəziyyətə baxıb, dəyərləndirəcəyik.

- Ötən mövsümü Azərbaycanda “Şamaxı” klubunda keçirdin. Yerli çempionatla Estoniya liqasını necə müqayisə edərdin?

- Azərbaycan çempionatı indi çox güclüdür. Orada legionerlərə limit yoxdur, bu mövsüm ümumiyyətlə, limiti ləğv etdilər. Bu də liqanın səviyyəsinin artmasına ciddi şəkildə təsir göstərir. Klublar daha güclü futbolçuları dəvət edə bilirlər. Üstəlik, Avropa səviyyəli komanda – “Qarabağ” var. Onlar daim avrokuboklarda çıxış edirlər, bunun hesbına da çempionatın səviyyəsi artır. Digər komandalar da bununla ayaqlaşmağa çalışırlar.

– Demək olar ki, limitin ləğvi Azərbaycan klublarının Avropada uğurlu çıxış etməsi üçün irəli atılmış bir addımdır?

– Düşünürəm ki, hə, səbəblərdən biri də budur.

– Sənin üçün ötən mövsüm necə keçdi? 

– Kubokla bir yerdə 15 oyun keçiridm. Yeni gələndə çox da oynamırdım. Amma vaxt keçdikcə adaptasiya oldum. Mövsümün sonlarına doğru daha çox oynamağa başladım. Ümumilikdə yaxşı təəssüratlarla ayrıldım. Hesab edirəm ki, futbolçu kimi daha güclü oldum və pozitiv təcrübə qazandım.

– Niyə Azərbaycanda qalıb oynamaq alınmadı? Orda qalmaq istəyərdin?

– Bir neçə səbəb var idi və sonda klubla birgə qərara gəldik ki, mənim üçün yeni variantlar axtarmaq daha yaxşı olar.

– O dəqiqə Estoniyaya qayıtmaq barədə düşünməyə başladın? 

– Yox, elə olmadı. Sadəcə təkliflərə açıq idim və müxtəlif variantlara baxırdım. Nəticədə, “Narva”nın baş məşqçisinin təklifi xoşuma gəldi. Başa düşdüm ki, bu, karyeramda irəli atılmış addım oalcaq. Legioner sayılmamağım vacib rol oynayacaq və daha çox oyun praktikası əldə edəcəyəm.

– Klubsuz qaldığın müddətdə nə ilə məşğul olurdun?

– Fərdi məşqlər edirdim, formada qalmaq üçün daha çox fiziki hazırlığıma diqqət yetirirdim. Sonra mənə baş məşqçi Kojuxovski zəng vurdu və soruşdu ki, özümü “Narva”da sınamaq istəyərəmmi? Dedim ki, təkliflərə açığam və çox qısa müddətdə biz müqavilə ilə bağlı razılığa gəldik.

– Sən hücumda da oynaya bilirsən, cağ cinahı da bağlamağı bacarırsan. Hansı sənin üçün daha rahatdır? 

– Əlbəttə, daha çox hücumda oynamq xoşuma gəlir: qol vurmaq, təhlükəli vəziyyətlər yaratmaq, irəlidə komandaya kömək etmək. Amma əgər məşqçi məni müdafiədə görürsə, bu da problem deyil. İstənilən mövqedə çıxış edib komandama kömək etməyə hazıram.

– Karyeranın əvvəlində daha çox müdafiədə oynayırdın? 

– Uşaq futbolunda hücumda çıxış edirdim. “Kalev” və “Levadiya” klublarında isə daha çox cinahlarda istifadə etməyə başladılar.