“Qarabağ”ın 19 yaşadək komandası (U-19) UEFA Gənclər Liqasını 6 məğlubiyyətlə sonuncu sırada başa vurdu. AFFA Gənclər Liqasında bu mövsüm məğlubedilməz olan və turnir cədvəlinin lideri olan “Qarabağ” turniri cəmi 1 qolla başa vurdu. Bəs Avropa klublarından bu qədər geri qalmağımızın səbəbi nədir?

Prosport.Az bununla bağlı komandanın kapitanı Əli Qazıbəyovdan müsahibə götürüb.

– "Ayaks"a 0:8 hesabı ilə uduzdunuz. Həmin matçda bu hesabın alınmaması üçün komandada nə çatmadı?

– Düşünürəm ki, ilk 30 dəqiqəni yaxşı oynadıq. 1 epizodda qapıçı zərbəmizi çıxardı. 32-ci dəqiqədə ilk qolu buraxdıq. Bundan sonra oyunumuz itdi. 2-ci qolu buraxanda isə 10 nəfər idik. Hikmət Cəbrayılzadə zədələnib oyundan çıxmışdı. Çox həvəsli idik. Qalib gəlmək istəyirdik. İlk hissə 0:3 bitdikdən sonra mental olaraq çökdük. Düzdür, məşqçilər dedi ki, oynayın, futboldur, hər şey ola bilər. Amma səhv etdik, oyundan tez qopduq. 2-ci hissədə də qapımızdan 5 top buraxdıq, burada rəqibin təcrübəsi də öz sözünü dedi. Çox məyusuq.

– Ola bilərmi ki, qələbəni həddindən artıq istəmək də sizi "yandırdı"?

– Bəli, səbəb də budur. İlk 30 dəqiqədə hamı gördü ki, komanda vuruşur. Hətta heç-heçəyə belə razı deyildik, ancaq qələbə istəyirdik. 0:3-dən sonra paltardəyişmə otağında çox məyus idik. Bu da sonda böyük hesablı məğlubiyyətə gətirib çıxardı. Həddindən artıq məyusuq.

– "Qarabağ"ın əsas komandası "Benfika"ya 0:2 uduzduqdan sonra geridönüş edə bilir. Bəs, sizdə niyə belə həvəsdən düşmə olur?

– Düzgün qeyd edirsiniz. İngiltərə futboluna baxsanız, 75-ci dəqiqədə 0:3 uduzan komanda elə oynayır ki, sanki hesab 0:0-dır. Amma biz 30-cu dəqiqədə 1 top buraxırıq, özümüzü elə aparırıq ki, sanki oyun bitdi. Bu bizim Avropa mentalitetindən fərqimizdir. Əminəm ki, biz 3:0 öndə olsaydıq, "Ayaks" 4 top bizə vurub qalib gələcəkdi.

– Kapitan kimi komanda yoldaşlarına iradlarınız olur?

– Bəli. Daimi olaraq komandaya dəstək verirəm. Futboldur, hər şey ola bilər. Ən azından hərə özü üçün oynasa, döyüşsə, hər şey ola bilər. Bu, futboldur. Rəqib komanda qırmızı vərəqə alandan sonra biz 1-2 qol vurarıq. İstəkli oynasaydıq, ən pisi, 0:3 yox, 2:3 olacaqdı. Və ya lap 0:4, 1:4, 2:4 olacaqdı. Amma bu hesab qeydə alınmayacaqdı.

– Ümumilikdə turnirə yekun vursaq, 6 matçın hansında oyununuzu daha yaxşı saymaq olar? Hansı komanda ilə görüşdə daha yaxşı oynadınız, məğlubiyyətə layiq deyildiniz?

– “Napoli” ilə oyunda məğlubiyyətə layiq deyildik. Həqiqətən çox yaxşı oynadıq. Sadəcə, orada hava şəraitində müəyyən problemlər oldu, oyun tez-tez dayandı, temp düşdü. Bu onlara da sərf edirdi, çünki 5-ci dəqiqədə hesabı açmışdılar. Küləyə görə səhvdən qol buraxdıq. “Atletik"ə də uduzmuşduq, amma kişi kimi. Çıxdıq, vuruşduq, mübarizə apardıq, döyüşdük, hər şeyi etdik. 0:3 hesabı ilə uduzduq, amma belə baxsaq, Bilbao təmsilçisi Gənclər Liqasının turnir cədvəlində “Real”dan sonra 2-cidir. Buna rəğmən, döyüşdük və əzmkar oyun göstərdik. 1 qolu penaltidən vurdular, 1-ni də biz öz qapımıza. Orada bəlkə daha az top buraxa bilərdik. Hesab 0:1 də ola bilərdi. Adicə burada “Çelsi” ilə ilk 45 dəqiqədə yaxşı oynadıq, hesab 0:0 idi. Bütün oyunlarda yaxşı oynayırıq, amma 1 qol buraxandan sonra alınmır.

– Elə onu vurğulamaq istəyirdim ki, “Benfika”, “Atletik" və “Napoli” ilə oyunlarda erkən qollar buraxmağınız da komandanın oyununa təsir edir...

– Bəli. Oyun həyəcanı var. Hər oyunçuda ilk 15 dəqiqədə həyəcan olur. İlk belə turnirimizdir. “Ayaks”, “Çelsi” və digər komandalar hər ay belə turnirlərdə iştirak edir və templi oyuna öyrəşiblər. Biz isə keçən həftə “Sumqayıt”la oynayırıq, bu həftə isə “Ayaks”la. “Ayaks”la “Sumqayıt” arasında dünyalar qədər fərq var və bu tempi tutana qədər biz qol buraxırıq. Bundan sonra da artıq hər şey dəyişir. Geridə başlayanda gərək komandaya qarşı pressinq edəsən. Belə komandalara qarşı da pressinq alınmır.

– Komanda yoldaşlarınız arasında belə söhbətlər olub ki, gəlin, özümüzü yaxşı tərəfdən göstərək, bəlkə hansısa seleksiyaçı məşqçi bizi gördü və Avropa komandalarına transfer etdi? Belə istək vardı?

– Bəli. Oyundan əvvəl danışırdıq. Bir-birimizə dəstək verirdik. Mən həmişə deyirdim ki, hər şeyi kənara qoyun, ən azından özünüz üçün oynayın. Bəlkə “Ayaks”ın burada 4-5 skautu var idi. Gördü, sizi bəyəndi və apardı. Karyeranızın önü açıldı. Hər şey ola bilər. Ən azından özünüz üçün, öz karyeranız üçün oynasanız, əla olar.

Səbuhi Musa