Cüdo üzrə üçqat Avropa mükafatçısı Məmmədəli Mehdiyev Qazaxıstanın paytaxtı Astanada yerli "Dinamo" Bədən Tərbiyəsi-idman cəmiyyətinin 100 illiyi münasibəti ilə keçirilən turnirdə qalib olub.

Prosport.Az-ın xəbərinə görə, təşkilatçılar Qazaxıstan millisi ilə "Dünya" komandası arasında sərbəst güləş, cüdo, sambo, əlbəyaxa döyüş, qrapplinq və qazax güləşi üzrə yarış keçirilib. Görüş dostluqla – 3:3 hesabı ilə başa çatıb.

Azərbaycanı cüdoda 32 yaşlı veteran idmançımız M.Mehdiyev təmsil edib. Onun rəqibi 31 yaşlı Yersultan Müzəffərov olub. Əsas vaxtda qalibi müəyyənləşdirmək mümkün olmayıb. "Golden Score" isə 27 dəqiqə çəkib (ümumilikdə 31 dəqiqə). Sonda bu ağır görüşün qalibi Məmmədəli olub. Qalib gəldiyi üçün Mehdiyevə 500 min tenge (təxminən 1500 manat) təqdim edilib.

Bu turnirdə Azərbaycan DİN İdman Cəmiyyətinin sədri, polkovnik Mövlud Mirəliyev və məşqçi Mehman Əzizov da iştirak edib.

Qeyd edək ki, Məmmədəli Mehdiyev 2023-cü ilin avqustun 31-də karyerasını başa vurduğunu açıqlayıb. O, Əlahiddə Çevik Polis Alayının leytenantıdır.