"Bu il keçirilən son Azərbaycan çempionatı bir daha göstərdi ki, ölkəmizdə cüdonun həm təşkilati səviyyəsi, həm də idmançılar arasında olan rəqabətin keyfiyyəti ildən ilə daha da yüksəlir. Hələ yarışın ilk günündən hiss olunurdu ki, hazırlıq mərhələsində görülən işlər – tatamilərin qurulmasından tutmuş texniki zonanın tərtibatına, tibbi xidmətin operativliyinə və logistikanın təşkilinə qədər hər bir xırda detal dəqiqliklə planlaşdırılıb".
Bu sözləri Prosport.Az saytına açıqlamasında Azərbaycan Cüdo Federasiyasının hakimlər üzrə meneceri, “A” kateqoriyalı beynəlxalq dərəcəli hakim Mətin Rəhimli deyib.
ACF rəsmisi bildirib ki, cüdo üzrə son Azərbaycan çempionatındakı təşkilatçılıq həm hakimlərin işini yüngülləşdirdi, həm idmançıların rahatlığını təmin etdi, həm də yarışın ümumi ritmini pozmadan davam etməsinə şərait yaratdı: "Yarışın bu qədər problemsiz və yüksək səviyyədə keçməsində ən ciddi səbəblərdən biri də fikirimcə, hakimlərin göstərdiyi professionallıq və bu kollektivdə yaranmış xoş münasibətlərin son zamanlar ən yüksək səviyyəyə çatması oldu.
Çempionat boyu bunu bir daha aydın gördüm. Hakimlərin bir-birinə verdiyi dəstək, qərarların koordinasiyalı şəkildə qəbul olunması, gərgin vəziyyətlərin soyuqqanlılıqla və birlikdə həll edilməsi yarışın axıcılığını təmin edən əsas amillər idi. Bu birlik çətin epizodlara daha operativ reaksiya verməyə, videotəkrar prosesinin qüsursuz aparılmasına, qərarların dəqiqliyinin artmasına, ümumi ritmin heç bir gecikmə olmadan qorunmasına
güclü təsir göstərdi".
M. Rəhimlinin sözlərinə görə, bu gün Azərbaycan cüdo hakimliyinin gücü ədalət təmsilçilərinin fərdi peşəkarlığı ilə yanaşı komanda harmoniyasında və bir-birinə güvənindədir: "Yarışdan öncə keçirilən son seminarın təsiri isə çempionat zamanı çox aydın hiss olundu. Çempionatın başlamasına 2 gün qalmış təşkil edilmiş praktiki seminar zamanı qayda dəyişiklərinin birlikdə analiz olunması, mübahisəli epizodların video üzərindən təkrar nəzərdən keçirilməsi və vahid standartlara uyğunlaşma hallarının təkrarı bizim işimizi xeyli asanlaşdırdı".
Referi bu il komandalarına qoşulan 2 yeni hakimin da bu yarışda çıxışının onun üçün xüsusi sevindirici olduğunu vurğulayıb: "Həm davranış baxımından, həm qaydaların tətbiqi, həm də ümumi komanda ilə birgə işə yanaşmaları zamanı özlərini çox yaxşı tərəfdən göstərdilər. Onların kollektivə qısa zamanda uyğunlaşması, təcrübəli hakimlərlə yanaşı çətin vəziyyətlərdə doğru qərarlar verməsi cüdo hakimliyinin gələcəyi üçün çox vacib amillərdəndir".