Sərbəst güləş üzrə dünya üçüncüsü Arseni Cioyev federasiyasının rəsmi saytına müsahibə verib.

Prosport.Az həmin müsahibəni təqdim edir:

– Güləşə necə gəlmisiniz?
– Güləşə böyük qardaşımın izi ilə gəldim. Atam onu məşqə gətirirdi. Mən də zalda oynayırdım. Əvvəl yavaş-yavaş bunu arzuladığımı gördüm və onda anladım ki, güləşi seçməliyəm.

– 2023-cü ildən bəri Azərbaycan millisinin üzvüsünüz. Azərbaycanı seçmək karyeranıza necə təsir etdi?
– Bəli, artıq 2 il yarımdır ki, Azərbaycanı təmsil edirəm. Bu müddət ərzində həyatımda çox şey dəyişdi və bütün bunlar yalnız müsbətə doğrudur.

– Bu müddət ərzində iştirak etdiyiniz 10 nüfuzlu turnirdən 8-də medal qazanmısınız. Nəticələrinizdən razısınız?
– Keçid dövründə qarşılaşdığım müsbət hadisələr mənə ciddi təsir etdi. Güclü komandanın tərkibində yer aldığım üçün çox xoşbəxtəm. Azərbaycan mənim 2-ci evimdir və buna görə minnətdaram. Allahın köməkliyi ilə nəticələrimi sabit saxladığımı və ölkəmizə medallar qazandıra bildiyimi göstərə bildim.

– Hansı medal və görüş sizin üçün ən dəyərli və yaddaqalan olub?
– Mənim üçün ən dəyərli mükafat son dünya çempionatında qazandığım bürünc medal və İslam Həmrəyliyi Oyunlarının qızılıdır. Hər 2 yarışa çox ciddi və inadla hazırlaşmışdım. Ən vacib qarşılaşmam isə iranlı dünya çempionu Kamran Qasempurla olan görüşüm idi.

– Yeri gəlmişkən, İslam Həmrəyliyi Oyunlarında ilk mərhələdə titullu rəqibinizə qalib gəldiniz. Kamranı məğlub edəcəyinizə inanırdınız? Qarşılaşmanı necə planlaşdırırdınız? Hesabda geridə olarkən ruh düşkünlüyü ilə üzləşmədiniz?
– Bu yarışa böyük səylə hazırlaşmışdım. Əlbəttə ki, özümə inanırdım. Hesabda geri düşəndə belə, gücümdən və Allahın köməyindən ümidimi kəsmirdim. Taktikanı məşqçilərimlə birlikdə qurduq və bunun sayəsində qalib gəlməyə nail oldum. Məşqçilərimizə çox minnətdaram.

– Qarşıdakı Azərbaycan çempionatında əsas rəqibləriniz kimlərdir?
– Azərbaycanda mənim çəkimdə çox yaxşı idmançılar var. Gənc nəsil də sürətlə inkişaf edir. Kimisə xüsusi fərqləndirmək istəmirəm.

– 86 kq sərbəst güləşdə güclü rəqabətin olduğu çəkidir. Belə rəqabətdə uğur qazanmaq üçün hansı şəxsi keyfiyyətlər üzərində işləyirsiniz?
– Mən güləş bacarıqlarımı artırmaq üçün hər bir detal üzərində işləyirəm. Təkcə qalib gəlmək yox, rəqiblərimdən nəzərəçarpacaq dərəcədə üstün olmaq və görüşlərdə tam dominanlıq etmək istəyirəm.

– Sizcə, bu çəkinin liderləri kimlərdir?
– Son dünya çempionatı da göstərdi ki, hazırda bu çəkinin lideri amerikalı Zahid Valensiyadır.