Bakı İdman Sarayına (BİS) yeni direktor təyin olunub.

Prosport.Az-ın xəbərinə görə, bu, tanış simadır.

Belə ki, Naxçıvan Muxtar Respublikasının (NMR) sabiq gənclər və idman naziri Ramil Hacı BİS-ə direktor təyin olunub.

39 yaşlı Ramil Hacı iş karyerasına 2012-ci ildən NMR-in Gənclər və İdman Nazirliyinin tabeliyində olan Uşaq Gənclər İdman Məktəbində məşqçi müəllim kimi başlayıb.

2013-cü ildə NMR-in Fövqəladə Hallar Nazirliyinin Sulardan Xilasetmə taqım komandiri vəzifəsinə təyin edilib. 2014-cü ilin oktyabr ayı xidmət müddəti başa çatdığı üçün ehtiyata buraxılıb.

2015-ci ildən Uşaq Gənclər İdman Məktəbinin təlimatçısı vəzifəsinə daxil olub. 2019-2021-ci illərdə Naxçıvan Şəhər İlham Əliyev adına Olimpiya İdman Kompleksinin direktoru işləyib.

2021-ci ildə NMR gənclər və idman naziri vəzifəsinə təyin olunub. 2023-cü ildə NMR Ali Məclis sədrinin I müvaininin sərəncamına əsasən nazir vəzifəsindən azad edilib.

O, həmçinin, 2023-cü ildən Azərbaycan Respublikası Gənclər və İdman Nazirliyinin "Azəridmanservis" Məhdud Məhsuliyyətli Cəmiyyətində İdmanın inkişafının rəhbəri vəzifəsində işləyir.

Yeri gəlmişkən, bu, Azərbaycanda nazir postunda işləmiş bir şəxsin idman obyektinə direktor təyin edildiyi ilk belə haldır.

Xatırladaq ki, Bakı İdman Sarayının əvvəlki direktoru Prezident İlham Əliyevin Təhlükəsizlik Xidmətinin rəisi Fərid Əsgərovun qardaşı Əli Əsgərov olub. O bu il vəzifəsindən ayrılıb və iyunun 8-də "Arpaçay" İdman Birliyinin prezidenti seçilib.