Azər Bağırov "Kəpəz"ə oktyabrın 1-də yenidən baş məşqçi təyin olundu. "Kəpəz" bugünkü matçadək 8 matç keçirmiş və bunların 5-də məğlub olmuşdu. 

Uduzduğu rəqiblər kimlər idi? "Qarabağ", "Sabah", "Zirə", "Neftçi". Yalnız "İmişli"yə 0:3 hesablı məğlubiyyət gözlənilməz alındı. Bunu da komandanın 25-ci dəqiqədən etibarən azlıqda oynaması ilə əlaqələndirmək olar. Komanda bundan əvvəl onun rəhbərliyi altında Şamaxıda Ayxan Abbasovun komandasını 4:1 məğlub etmişdi ki, bunu da unutmamalıyıq.

Lakin mənə görə, Azər Bağırov "Kəpəz"də sözünü indidən sonra deyəcək. Mən Azər Bağırovun "Kəpəz"ə geri döndüyünü məhz Azərbaycan Kubokunun 1/8 final matçından sonra hesablayıram. Çünki artıq o, 2 ay müddətində tərk etdiyi və geri dönərkən yenilənmiş "Kəpəz"ə adaptasiya vaxtını adladı. Bu gün avrokuboklara iddialı "Araz-Naxçıvan"ı büdrətməsi artıq onun geridönüşünün sübutudur. Hərçənd, bu qələbə Azər Bağırovun "Araz-Naxçıvan"ın rəhbərliyinə vaxtı ilə ona edilənlərə görə barmaq silkələməsi kimi də səciyyələndirilə bilər.

Komanda noyabrın 21-də Yevlaxda "Karvan"ı 2:1 məğlub edəndə, sonuncu sıranı da onun rəhbərliyi altında tərk edib. Azərbaycan Kubokunda isə I Liqaya düşmə zonasında olan Gəncə komandası artıq ölkə Kubokunda 1/4 finaldadır. 

"Turan Tovuz"la 1/4 final matçı Qərb derbisi kimi indidən maraq doğurur. Deyərdim ki, "Kəpəz" həmin matçlara daha hazır çıxacaq. Niyə? Əvvəla, bu mərhələ ev-səfər prinsipi ilə keçiriləcək. 2-cisi isə matçlar qış fasiləsindən sonra baş tutacaq. Deməli, "Kəpəz"in məşqçilər korpusunun qış transfer bazarında komandada görmək istədiyi futbolçuları heyətə qatmaq üçün fürsəti olacaq. Yəqin ki, yeni rəhbərlik də bu şansı görür və bu baxımdan səxavət qutusu klun skaut sisteminin üzünə açılacaq.

Səbuhi Musa