2026-cı ilin oktyabr ayında Bakı Su İdmanı Sarayı üzgüçülük idmanının ən nüfuzlu yarışlarından birinə – “Silk Road” (İpək Yolu) Dünya Kubokuna ev sahibliyi edəcək.

Prosport.Az xəbər verir ki, Azərbaycan Üzgüçülük Federasiyasının prezidenti Zaur Əliyev və Dünya Su İdmanı Federasiyasının (World Aquatics) prezidenti Hüseyn Əl-Müsəlləm 2026-cı ilin 1-3 oktyabr tarixlərində Dünya Kubokunun Bakıda keçirilməsinə dair rəsmi müqavilə imzalayıb. İmzalanma mərasimində gənclər və idman naziri Fərid Qayıbov da iştirak edib.

Bu, World Aquatics-in Azərbaycanda keçirəcəyi ilk yarış olsa da, ölkəmizin 2015-ci ildə I Avropa Oyunları, 2017-ci ildə IV İslam Həmrəyliyi Oyunları və 2019-cu ildə Avropa Gənclər Olimpiya Festivalı kimi multiidman yarışlarını keçirmə təcrübəsi var. Zaur Əliyev təşkilatçılıqla bağl bunu deyib:

“Bakı şəhərinin 2026-cı il üzgüçülük üzrə Dünya Kubokunun açılış mərhələsi kimi seçilməsi ölkəmizin su idmanı üçün əlamətdar bir mərhələdir. Su İdmanı Sarayı son 10 ildə bir neçə böyük beynəlxalq tədbirə ev sahibliyi edib və ilk dəfə Dünya Su İdmanı Federasiyasının yarışına ev sahibliyi etmək ambisiyalarımızı yeni səviyyəyə qaldırır. Dünyanın ən güclü üzgüçülərini Azərbaycana dəvət etməyi və bu idman növünün inkişafına, gənc idmançılara ilham verməyə və Dünya Su İdmanı Federasiyası ilə tərəfdaşlığımızı gücləndirməyə sadiq olduğumuzu nümayiş etdirməyi səbirsizliklə gözləyirik”.

Qeyd edək ki, “Silk Road” Dünya Kubokunun ilk mərhələsi məhz Bakıda təşkil olunacaq. Yarışın növbəti mərhələləri isə 8-10 oktyabrda Daşkənd (Özbəkistan) və 15-17 oktyabrda Astana (Qazaxıstan) şəhərlərində keçiriləcək. Mükafat fondu 1,2 milyon dollar olacaq. 50-dən çox ölkənin 750-dən çox idmançısı bu böyük mükafat fondunun bir hissəsi uğrunda mübarizə aparacaq. Xüsusilə, dünya rekordu qıranlar və tac qalibləri hər müstəsna çıxış üçün 10 min dollar alacaq.

Bu ilin oktyabrında bu yarış ABŞ-nin Karmel, Vestmont və Kanadanın Toronto şəhərlərində baş tutub.