Azərbaycan cüdoçusu Kənan Nəsibov (+100 kq) dünya reytinqində böyük irəliləyişə nail olub.

Prosport.Az xəbər verir ki, Beynəlxalq Cüdo Federasiyası (IJF) planetin cüdoçuları üzrə yeni dünya reytinqini açıqlayıb.

Azərbaycan cüdosunda ən nəzərəçarpan dəyişiklik super-ağır çəki dərəcəsində baş verib. K. Nəsibov (2055 xal) birdən-birə 11 pillə irəliləyərək +100 kq kateqoriyasında dünya reytinqinin ilk "20-liy"inə daxil olub. O, hazırda 20-cidir.

Nəsibovun irəliləyişinə onun dünən Xorvatiyanın Zaqreb şəhərində keçirilən Qran-pri turnirində əldə etdiyi qələbə səbəb olub. Qeyd edək ki, o, bu il, U-23 Avropa çempionatında da qızıl medal qazanmışdı. Nəsibov gənclər arasında qitə birinciliyini qazanan ilk azərbaycanlı cüdoçu kimi tarixə düşüb.

Komandanın digər liderlərinə gəldikdə isə, Olimpiya çempionları Hidayət Heydərov (73 kq, 4176) və Zelim Kotsoyev (100 kq, 5118), eləcə də Avropa çempionu Elcən Hacıyev (90 kq, 3651) öz çəki dərəcələrində 2-ci yerldəki mövqelərini qoruyublar.

Bundan başqa, Ruslan Paşayev (66 kq, 2991) 5-ci yerdə qərarlaşıb, Zaqreb Qran-prisində bürünc qazanan Vüqar Talıbov (90 kq, 2197) 13-cü pillədədir. Xorvatiyadakı turnirin daha bir bürünc mükafatçısı Hüseyn Allahyarov (60 kq, 520) isə 65 pilləlik irəliləyişlə 78-ci yerə yüksəlib. Eyni çəki dərəcəsində – 60 kq-da yarışan Balabəy Ağayev (3356) isə 6-cı yerdən 7-ci pilləyə enib.