"Neftçi" İdman Klubunun basketbol komandası sabah Estoniyanın paytaxtı Tallində FIBA Avropa Kubokunun I qrupunun autsayderi olan "Kalev/Kramo" ilə qarşılaşacaq.

Prosport.Az-ın Tallinə ezam olunmuş əməkdaşı "Neftçi"nin bu gün Kalev İdman Zalında keçdiyi ilk məşqdən sonra ukraynalı baş məşqçi Vitali Stepanovskidən müsahibə götürüb.

– Bakıda bu rəqibinizə over-taymda qalib gələ bilmişdiniz. Daha sonra "Abşeron Layns" da "Kalev/Kramo"ya qalib gəldi. Siz bu dəfəki matç barədə nə deyə bilərsiniz?
– İlk növbədə onu deyə bilərəm ki, "Kalev/Kramo" çox yaxşı komandadır. Bir neçə dəfə Estoniya çempionu olublar. Estoniya millisində oynayan basketbolçuları var. Uzun müddət bir yerdə oynadıqlarından, basketbolçuları bir-birlərini yaxşı başa düşür, necə çıxış etməli olduqlarını bilirlər. Bəli, evdə onları over-taymda çətinliklə məğlub etdik. İndi isə tam gücümüzlə nəticəmizi təkrarlamaq istəyirik. Onların son oyununu analiz etmişik. Bir neçə dəyişiklikləri var. Təəssüf ki, biz də zədədən yan keçməmişik. Əsas heyət üzvümüz Marko Şinik zədə alıb. İndi digər oyunçulardan bu mövqedə necə istifadə edə biləcəyimiz barədə düşünürük. Sabahkı oyuna çox inamlı şəkildə hazırlaşırıq.

– Marko Şinikin olmaması komandaya nə dərəcədə təsir edə bilər?
– Təbii ki, oyunun təşkilində onun olmaması bizə təsir edəcək. Çünki o, komandanın dirijoru rolunda çıxış edirdi.

– "Sabah"la Azərbaycan Basketbol Liqasındakı son turun oyununu təxirə salmaq üçün federasiyaya müraciət etmişdiniz?
– Avrokuboklarda çıxış edən komandanın həftədə 2 oyun keçirməsi normal haldır. Əgər avrokuboklarda çıxış edirsənsə, çərşənbə günü oyuna çıxmalısan, şənbə-bazar isə çempionat matçı keçirməlisən. Bütün komandalar belə oynayır. Tək biz yox...

– Ancaq məhz həmin matçda əsas komandanın oyunçuları çıxış etdiyindən, Şiniki itirdiniz...
– Zədədən heç kim sığortalanmayıb. Belə zədəni məşq zamanı da, oyun zamanı da almaq olar. Marko zədəni kontaktsız vəziyyətdə aldı və cəmi 7 dəqiqə oynaya bildi. İrəliyə baxırıq. Ona isə tez sağalmağı və sıralarımıza tezliklə qayıtmağı arzulayırıq.

– Əsas heyəti "Sabah"la avrokubok matçı öncəsi buraxmağınızdan belə başa düşmək olar ki, siz tək avrokuboklara yox, həm də çempionata önəm verirsiniz. 2 cəbhədə mübarizə aparmaq çətin deyil?
– Sözsüz, biz hər iki turnirə çox önəm veririk. Hər oyuna sonuncu matç kimi yanaşırıq. Asan oyun olmur. "Sabah"la matça da qələbə üçün çıxmışdıq.

Səbuhi Musa
Tallin