Fransanın paytaxtı Parisdə veteranlar arasında dünya çempionatında Fərhad Rəcəblinin 13-cü dəfə qızıl medal qazana bilməməsi təəccüblə qarşılandı. Onun finalda almaniyalı Volfqanq Hintalaytnaya ipponla uduzması nəticədə gümüş medalla kifayətlənməsinə səbəb oldu.
Prosport.Az təcrübəli veteran idmançıdan bunun səbəbləri barədə soruşub.
– Fransada veteranlar arasında dünya çempionatının gümüş medalı ilə kifayətləndiniz. Çıxışınızı necə qiymətləndirirsiniz?
– Əlbəttə ki, qalib gəlmək istəyirdim. Sadəcə olaraq, məndə səhv oldu. 1 səhv etdim, rəqib də o səhvimdən istifadə etdi. Nəticədə osae-komiyə düşdüm, məğlub oldum. Normal qəbul edirəm. Qələbə Allahdandır, verən də odur, alan da. Düzdür, hər dəfə o rəqibə qalib gəlmişəm. 2 dəfə ipponla qalib gəlmişəm, 1 dəfə isə heç-heçə bitmişdi, hakimlərin rəyi ilə qalib elan olunmuşam. Amma yenə də ağır rəqibdir.
– 8 dəfə ardıcıl olmaqla 12 dəfə dünya çempionu olmusunuz. Bu dəfə nə maneə oldu? Məğlubiyyətin əsas səbəbləri nədir?
– Bu səfər ilk dəfədir ki, yarışın reqlamentini dəyişiblər. Normalda bizim yaş qrupları – 60 yaşdan yuxarı güləşənlər yarışın ilk günü tatami üzərinə çıxırdı. Bu dəfə dəyişiblər. Gənclərdən başlayıblar. Bizi sonuncu günə saxladılar. Mən də həm də komandanın baş məşqçisiyəm. Komanda ilə 3 gün məşğul oldum, 1 gün də qeydiyyat məsələləri ilə. Sonra uşaqların bəziləri gec gəldilər, qeydiyyat da bitirdi. Açığı, mən də bir qədər əsəbləşdim. Əsas çox yorğun oldum. Hər gün bu işlə əlaqəli 14-15 km piyada gəzirdim. 4 gün çox yoruldum. Bu cəhətdən ağır oldu. Normalda isə mən ilk gün özüm döyüşürdüm, çempion olurdum, sonra da artıq komanda ilə məşğul olurdum. Amma bu dəfə təsir etdi. Artıq ilk görüşdən yorğun idim.
– Komandanın ümumi çıxışını necə dəyərləndirirsiniz? Turniri 2 qızıl, 1 gümüş və 4 bürünc medalla başa vurdunuz...
– Açığı, komandamızın nəticəsindən razı deyiləm. Yəqin siz də müşahidə etmisiniz ki, hər dəfə bizdə 4-5 nəfər çempion olurdu. Bu dəfə cəmi 2 nəfər çempion oldu. Əlbəttə, bunun səbəbləri var. Bunun ən əsas səbəbi odur ki, əvvəllər komandamız birgə məşq edirdi. İndi isə o şərait bizdə yoxdur. Biz əvvəl Sumqayıtda qrup şəklində məşq edirdik. Düzdür, orada da şəraitsizlik var. İndi isə Bakının 3 yerində 4-5 nəfərlik qruplarla məşq edirik. Ayrı-ayrı hazırlıq gedir. Medalların az olmasının səbəblərindən biri budur. Bunun da səbəbkarları var.
– Növbəti hədəfləriniz barədə nə deyə bilərsiniz?
– İnşallah, məşqlərimiz davam edəcək. Mən özüm də məşqlərimə davam edəcəyəm. Gələn il iyunda, yenə Fransada bu dəfə Avropa çempionatı olacaq. Dünya çempionatının dəqiq tarixi və yeri təyin olunmayıb. Bundan savayı veteranlar arasında çoxlu turnirlər var. Amma təəssüf ki, biz o turnirlərdə iştirak edə bilmirik. Çünki uşaqlar maddi cəhətdən çətinlik çəkir. Bu gün də Avropa və dünya çempionatlarına uşaqlar özləri pul toplayıb gəlib. Ona görə belə problemlər var. Fransanın veteran cüdoçularına yəqin diqqət elədiniz. Hər 3-ündən 1-i, hətta daha çoxu fransalı veteranlar idi. Ona görə nəticələri də var. Amma bizdə veteran idmanına diqqət azdır. Motivasiya yoxdur. Ona görə də nəticələr aşağı düşür.
– 34 idmançı ilə qatılmışdınız. Ağır çəkidə İmran İmanov işi ilə əlaqədar icazə ala bilməmişdi. Amma yarış günü məlum oldu ki, daha 2 idmançımız yarışmayıb. Səbəb nə idi?
– Hamı təyyarə bileti və vizanı özü alır deyə, problemlər oldu. 90 və 100 kq çəkidə idmançılarımız iştirak edə bilmədi. Daha doğrusu, onlardan 1-i Parisə gəldi, ancaq gecikdiyi üçün güləşə bilmədi, yalnız tamaşa etdi.
Mahmud