I Liqanın bombardirlər cədvəlində yer alan, sentyabr ayında ən yaxşı qolun müəllifi seçilmiş, "Şahdağ Qusar"ın hücumçusu Ruslan Voronsovun Prosport.Az saytına müsahibəsi
– Ötən tur rəqib autsayder "Şimal" olsa da, 2 dəfə matçda önə keçib sizə çətinlik yaratdı. Şimal derbisi haqda nə deyə bilərsiniz?
– I Liqada autsayder və lider anlayışı yoxdur. Hamı bir-birinə rəqibdir, bir-birinə qarşı yaxşı köklənə bilir. Oyuna yaxşı hazırlaşmışdıq. Amma ilk 15 dəqiqəni yaxşı keçirə bilmədik. Sonradan bir az toparlandıq. 2-ci hissədə 1 qol da buraxdıq. Ancaq Allaha şükür ki, əzmkar oynayıb qələbə qazana bildik.
– İlk 2 turda qol vurduqdan sonra dayanmışdınız. 41-ci dəqiqədə özünüz də "qol orucu"nuzu pozdunuz...
– Bəli, 4 oyundur ki, qol vura bilmirdim. Ayağım açıldı. İnşallah, bundan sonra qol vurmağa davam edib komandaya daha çox xeyir verərəm.
– Ümumiyyətlə, bombardirlər cədvəlində 4 qolla 2-ci sıradasınız. Fərdi planda bombardir olmaq kimi xüsusi niyyətiniz var?
– İnşallah ki, mən də bunu etmək niyyətindəyəm. Nə qədər mümkündürsə, qol vurub bombardirlər cədvəlində irəliləmək istəyirəm.
– Sentyabrda MOİK-ə vurduğunuz qola görə ayın qolu nominasiyasında mükafatlandırıldınız. Bu mükafata layiq görüləcəyinizi gözləyirdiniz?
– Həmin ay çox yaxşı qollar vurulmuşdu. Vurduğum qolun ən yaxşı seçiləcəyini gözləmirdim. Sağ olsunlar ki, mənim qolum ən yaxşı seçildi. Mənim üçün sürpriz oldu. Bu qolu seçən münsiflər heyətinə təşəkkürümü bildirirəm.
– Ötən mövsüm "Qəbələ"də çıxış edirdiniz. "Qəbələ" Premyer Liqaya çıxsa da, sizə ehtiyac olmadı. Bu sizə pis təsir etmədi?
– Açıq danışaq. Bu hər bir futbolçuya pis təsir edər. Müqaviləm 1+1 illik idi. Hər bir futbolçu əziyyət çəkib komandaya kömək edibsə, Premyer Liqada çıxış etmək istəyər. Ən azından mənə şans verə bilərdilər.
– Ümumiyyətlə, Premyer Liqada çıxış etmək hələ sizə qismət olmayıb...
– Bəli. Buna çox yaxın idim, amma alınmadı. İnşallah, alınar.
– Çox adam bilmir ki, bacınız Tatyana da güləşçi olub. Bu haqda da danışardınız...
– O, Rusiyada I MDB Oyunlarının, həmçinin gənclər arasında Avropa çempionatının medalçısı olub. Amma indi güləşmir.
– Bəs başqa ailədə idmançı var?
– Yox, elə ikimizik (gülür).
– Mingəçevir futbol məktəbinin yetirməsisiniz. Soyadınıza və milliyyətiniz də aydınlıq gətirərdiniz...
– Anam rus, atam azərbaycanlıdır. Ancaq Mingəçevirdə doğulub, boya başa çatmışam. Maksim Medvedev kimi azərbaycanlıyam (gülür).
– 4 turdur ki, paytaxtdan yığışıb Şamaxı və ya Ağsuya gedirsiniz. Hələ növbəti 2 turda da Zaqatala və Şamaxıda oyunlarınız var. Bu səfərlər komandaya pis təsir etmir?
– Qusarda öz meydançamızın olmaması komandaya pis təsir edir. Hər oyunu səfərdə keçiririk. Ev stadionu kimi Şamaxı Olimpiya Mərkəzinin stadionu göstərilsə də, Bakıdan saatyarımlıq məsafə də adamı yorur. Öz meydançamız olsaydı, azarkeş dəstəyi də görərdik. Hər tur səfərə çıxmaq çox ağırdır.
Səbuhi Musa
