Moldovanın paytaxtı Kişinyovda keçirilmiş cüdo üzrə 23 yaşadək (U-23) Avropa çempionatı Azərbaycan üçün uğurlu keçdi. Azərbaycan 2 qızıl, 1 gümüş və 1 bürünc medal qazanmala medal sıralamasında Gürcüstandan sonra 2-ci oldu.

Lakin ən sevindirici məqam +100 kq çəki dərəcəsində Kənan Nəsibovun çempion olması oldu. O, finalda polşalı Yakub Sordıla qalib gəlməklə ağır çəkidə Avropa çempionu olan ilk Azərbaycan cüdoçusu kimi adını tarixə yazdırdı.

Prosport.Az bu münasibətlə 21 yaşlı cüdoçudan müsahibə götürüb:

– Qitə miqyaslı turnirlərdə ilk qızıl medalınızı qazandınız. Hansı hissləri keçirirsiniz?
– Çox sevincliyəm. Mənim arzularımdan biri də Avropa çempionu olmaq idi. Avropa çempionatının mənim üçün başqa özəlliyi var idi. Bu günə qədər Avropa çempionatında ağır çəkidə qızıl medalımız olmayıb. Ümumiyyətlə, heç bürünc medal da qazanmamışdıq. Ona görə də Avropa çempionu olmağı çox istəyirdim. İnşallah gələn yarışlarda tam özümü hazırlayıb qalib olmaq fikrindəyəm.

– Yarımfinalda gənclər arasında dünya və Avropa çempionu olmuş Şalva Qureşidze üzərində qələbə qazandınız. Təcrübəli və titullu rəqiblə görüş çətun olmadı?
– O, çox güclü idmançıdır. Mən bu görüşdən bir gün əvvəl hiss edirdim ki, onunla görüşəcəyəm və düşündüyüm kimi də oldu. Bir gün əvvəldən hazırlaşdım və özümə söz verdim ki, ona qalib gəlməliyəm. Nə olsun ki, dünya və Avropa çempionudur. Özümə çox inanırdım ki, ona qalib gələcəyəm. Düzdür, hakimlər bir qədər cığallıq etdi. Mən ilk dəfə fənd tətbiq edəndə yuko xalımı vermədilər. Yalnız 2-ci dəfədən sonra verdilər. Şükürlər olsun ki, ona qalib gəldim. Özümə yarış günü çox inanırdım.

– Siz ağır çəkidə Avropa çempionatında qalib gələn ilk azərbaycanlı cüdoçu oldunuz. Sizcə, bu günə qədər Azərbaycan cüdo məktəbinin ağır çəkidə çempion yetişdirə bilməməsinin səbəbləri nədir?
– Düzü, bunun səbəblərini özüm də bilmirəm. Mən özümü nümunə göstərərək deyə bilərəm ki, “Kanokan-TT” idman klubunun yetirməsiyəm. Məşqçim Mehdi Canəliyev və Tərlan Həsənovdur. Buna baxmayaraq, Elxan Məmmədov da şəxsi məşqçim kimidir. Bunu daha yaxşı məşqçilər deyə bilər ki, niyə ağır çəkidə çempionlar yetişməyib.

– Los Anceles Olimpiadasına 3 ildən də az bir zaman qalıb. Dünya reytinq cədvəlində top-35-də 3 cüdoçumuz var: son 3 Olimpiadada çıxış etmiş təcrübəli Uşanqi Kokauri, Camal Həmzətxanov və siz. Olimpiada hədəfləriniz barədə nə deyə bilərsiniz?
– Əlbəttə, hədəfim Olimpiadada çıxış etməkdir və turnirin qalibi olmaqdır. Düzdür, Uşanqi Kokauri və Camal Həmzətxanov da perspektivli və təcrübəli idmançılardır. Hələ ki reytinq cədvəlində məndən qabaqdadırlar. Hədəfim onları arxada qoyub, Top-10-da qərarlaşmaqdır. Bunu zaman göstərər. Güclü olan qalib gəlsin.

Mahmud