"Lənkəran"nın kanadalı basketbolçusu Ankit Çoudhari klubun mətbuat xidmətinə müsahibə verib. Prosport.Az həmin müsahibəni təqdim edir:

- “Quba” ilə oyunda 41 xal topladınız. Özünüzdən belə bir performans gözləyirdiniz?

- Düzünü desəm, mən sadəcə düzgün şəkildə oynamağa və komandanın sisteminə uyğun davranmağa çalışıram. Oyuna rəqəmləri düşünərək çıxmamışdım. Məqsədim sadəcə rəqabət aparmaq, düzgün qərarlar vermək və komandama qələbə qazanmağa kömək etmək idi.
 
- Bəs 41 xal topladığınız oyunu karyeranızın ən unudulmaz matçı hesab etmək olarmı?

- Bu, indiyə qədərki ən yaddaqalan oyunlarımdan biridir. Xüsusilə də burada keçirdiyim ilk dövrlərdə. Amma mən bir oyuna çox qapılmaq istəmirəm. Əsas məqsədim daim inkişaf etmək və bu performansın üzərinə əlavə etməkdir.

- Bu performansdan sonra sizdən gözləntilər daha da artacaq. Bu səviyyədə davam edə biləcəyinizi düşünürsünüz?

- Mənim üçün əsas məsələ sabitlik, hər oyunda eyni diqqəti, enerjini və rəqabət ruhunu ortaya qoymaqdır. Bəzi günlər top daha çox səbətə düşür, bəzi günlər az, amma səylərim və hazırlığım həmişə eyni olacaq.

- "Lənkəran" klubu ilə əsas məqsədləriniz nələrdir?

- Əsas məqsədim bu komandaya qələbə qazandırmaq və onun inkişafına töhfə verməkdir. İstəyirəm ki, burada güclü bir komanda mədəniyyəti formalaşdırmaqda payım olsun.

- Azərbaycan Basketbol Liqası haqqında fikirləriniz necədir?

- Liqada çox istedadlı oyunçular var və hər komanda sonadək mübarizə aparır. Belə mühitin bir hissəsi olmaq çox xoşdur. Liqa sürətlə inkişaf edir və bu prosesdə iştirak etdiyim üçün məmnunam.

- Bir az da Azərbaycan haqqında danışaq. Lənkəranda yaşayırsınız, Bakıda və Qubada olmusunuz. Təssüratlarınızı bilmək maraqlı olardı...

- Azərbaycan məni çox təsirləndirib. İnsanlar mehribandır, mədəniyyət zəngindir və idmana olan həvəs çox güclüdür.
    
- Ölkəmizdə sizi ən çox nə cəlb edir?

- Buradakı təbiəti kəşf etməkdən zövq alıram. Xüsusilə də Lənkəranın sakit və mənzərəli olması. İndiyə qədər çox gözəl təcrübə yaşayıram.