2 gün əvvəl Hacı Nuran Hüseynov "Xarı Bülbül" voleybol komandasına prezident seçilib.

Bu münasibətlə Prosport.Az saytı 46 yaşlı Hacı Nurandan müsahibə götürüb.

– Bu kluba prezident seçilməyiniz necə baş tutdu?
– Ümumiyyətlə, mən Bakıda keçirilmiş I Avropa Oyunları və IV İslam Həmrəyliyi Oyunlarında səfir olmuşdum. Onda tanınmış 12 idman səfiri vardı. O vaxt rəhmətlik gənclər və idman naziri Azad Rəhimovun vaxtında ən aktiv səfir seçilmişdim. Özümün belə təbliğat işləri xoşuma gəlirdi. 2 ay əvvəl mənə "Xarı Bülbül" voleybol klubunun təsisçisi İlqar İmamquliyev tərəfindən prezident olmaq təklifi gəldi. Fikirləşdim ki, mənə belə adda komandaya prezidentlik etmək şərəf olar. Çünki komandanın adı işğaldan azad edilmiş gözəl guşəmiz Şuşa ilə bağlıdır.

– Amma etiraf edərsiniz ki, səfir işi ilə klub prezidenti olmaq ayrı-ayrı vəzifələrdir...
– Yox, təbii ki, bunun fərqindəyəm. Sadəcə olaraq, idmanın içində olduğumu bildirməyə çalışdım. İnanıram ki, bu işin öhdəsindən gəlməyi bacarağam.

– Hacı Nuran adı həm də marketinq baxımından önəmlidir. Sizin adın həm də kluba maliyyə tapılmasında müəyyən köməyi dəyə bilərmi?
– Azərbaycan Voleybol Federasiyasının vitse-prezidenti Faiq Qarayev demişkən, əsas maliyyə tapmaqdır. Düzdür, məni sırf bunun üçün bura gətirməyiblər. Ancaq məni bu posta gətiriblərsə, deməli, hər şey yaxşı olacaq.

– Bildiyimizə görə, "Xarı Bülbül" komandasının avrokuboklarda ilk püşkatmasında iştirak edəcəksiniz...
– Bəli, artıq bu gün saat 12:00-da püşkatmanın keçiriləcəyi Lüksemburqa yola düşəcəyik. Püşkatma özü isə sabah Bakı vaxtı ilə saat 14:00-da baş tutacaq.

Səbuhi Musa