Azərbaycan Voleybol Federasiyasının (AVF) baş katibi Fərid Xəlilov da vəzifəsindən göndərilib.

Prosport.Az-ın xəbərinə görə, bu gün AVF-nin İdarə Heyətinin iclası keçirilib. Görüşdə AVF-nin prezidenti, Dövlət Gömrük Komitəsinin (DGK) sədri Şahin Bağırov, vitse prezidentlər Faiq Qarayev, Bəhruz Quliyev və İdarə Heyətinin üzvləri iştirak ediblər. Tədbiri giriş sözü ilə qurumun prezidenti Şahin Bağırov açaraq iştirakçıları gündəlikdəki məsələlərlə tanış edib.

İclasda ilk olaraq baş katib vəzifəsi ilə bağlı müzakirə aparılıb. İdarə Heyətinin qərarı ilə AVF-nin baş katibi Fərid Xəlilov tutduğu vəzifədən azad edilib. Qərara əsasən, bu vəzifənin icrası müvəqqəti olaraq Faiq Orucova tapşırılıb.

Qeyd edək ki, Faiq Orucov DGK-nın Gömrük Tariflərinin Tənzimlənməsi və Ödənişlər Baş İdarəsinin Gömrük ödənişlərindən azadolmalara nəzarət şöbəsinin rəisidir.

Xatırladaq ki, Fərid Xəlilov 2021-ci ilin sonundan etibarən AVF-nin baş katibi vəzifəsinə təyin olunmuşdu. Onun federasiyadan göndərilmək ehtimalının çox olduğunu ilk olaraq saytımız yazmışdı.

Səbuhi Musa