"Şahdağ Qusar"ın prezidenti Rahid Əmirquliyevin Prosport.Az saytına müsahibəsi
– Əvvəlcə ondan başlayaq ki, Ağsu səfərində rəqib autsayderlərdən olsa da, sizə çətin anlar yaşatdı...
– Uşaqlar yaxşı mübarizə apardı. "Difai" autsayderlərdən biri olsa da, bizim də vəziyyətimiz ürəkaçan deyil. Düzdür, uşaqlar əllərindən gələni edir. Bildiyiniz kimi, bizdə problemlər çox idi. Bu problemlər hələ də davam edir. Buna baxmayaraq, uşaqlara təşəkkür düşür ki, "Şahdağ"ın adını yüksəkdə tuturlar. Oyuna gəlincə, düşünürəm ki, bizim komanda ilk hissədə çox yaxşı oynadı. Qol şanslarımız çox oldu. Onlardan istifadə etsəydik, hesab daha da böyük olardı. Düzdür, 2-ci hissədə "Difai" bizə çətinliklər yaşatdı. Ancaq sonda şükürlər olsun ki, 3 xalı qazana bildik.
– "Şahdağ Qusar"a prezident təyin olunduqdan sonra sizi meydanda görmürük. Oynayan prezident olmayacaqsınız?
– Dizimdən əməliyyat olunmuşam. Oynamamağımın prezident olmağımla əlaqəsi yoxdur. Məşqlərə təzə başlamışam. Yenidən oynamaq fikrim var. Düzdür, belə baxıram ki, mənə ehtiyac yoxdur. Maşallah, uşaqlar yaxşı oynayır (gülür).
– Meydançaya qayıdışınız nə vaxta gözlənilir?
– Açığı, 4-5 gün idi ki, meydançada qaçmağa başlamışam. Yəqin uzağı 3 həftəyə tam hazır olaram.
– Futbolun İnkişafı Fondu vasitəsilə kluba sponsorlar cəlb olundu. Ancaq onlar da deyəsən böyük məbləğ ayırmırlar...
– 2 sponsorumuz var. Sahibkarlardır, dəstək olurlar. Qusarda fəaliyyət göstərən ISFA və "İsmixanlı" şirkətləri sponsorlarımızdır. Hər iki şirkət maliyyə baxımdan bizə dəstək verir. Amma onlar da daimi sponsor deyil. Sadəcə, öz tərəflərindən dəstək verirlər. Buna da şükür edirik. Ancaq yenə də gözləyirik. Bəzi sahibkarlar var ki, söz verib, dəstək olacaqlar.
– Bəzi sponsorlar həm də klubda rəhbər olmaq istəyir. Siz bu baxımdan prezidentliyi təhvil verməyə hazırsınız?
– Komandanı himayəsinə götürəcəksə, heç bir problem yoxdur. İstəyirəm ki, "Şahdağ Qusar" yaşasın, Premyer Liqaya qatılsın. Ancaq hələ ki komandanı tam üzərinə götürmək istəyən adam yoxdur.
– Premyer Liqaya çıxmağa əsas namizədlər kimi "Şəfa" və "Səbail" göstərilir. Bəs sizdə bu mövsüm hədəf nədir? Bu mövsüm I Liqada debütantsınız, burada yeri qorumaq da hədəfdə var?
– Ötən mövsüm fikirlərimiz başqa idi. Fikirləşirdik ki, bu mövsüm bizim üçün yaxşı olacaq. Müəyyən problemlərə görə bu il çempionatı turnir cədvəlinin ortalarında bitirməyi hədəf qoymuşuq. Ən pis vəziyyətdə I Liqada qalmalıyıq. İndiki vəziyyətdə biz çempionluqdan danışa bilmərik. Vəziyyətimiz o deyil.
– Qardaşınız oğlu Rail Əmirquliyev də ehtiyatda idi. O, III turda "Səbail"lə səfər matçında debüt etdi. Onun çıxışı barədə nə deyə bilərsiniz?
– 19 yaşı var, yarımmüdafiəçidir. Əvvəl "Sabah", "Səbail" və "Araz-Naxçıvan" akademiyalarında olub. Bizdə də gənclər çoxdur. Baş məşqçi Elnur Abdullayevlə məsləhətləşib, onu komandaya gətirdik. İndi zədəlidir, az oynayır. Ümid edirəm ki, o da özünü göstərə biləcək.
– Sizin nəsil futbolçular nəslidir. Oğlunuz da "Qarabağ" Akademiyasındadır...
– Düzdür. Qardaşım da futbol oynayıb. "Şahdağ"da, "Kəpəz"də çıxış edib. Görək, sonacan bizim yolla gedəcəklər, yoxsa yox...
Səbuhi Musa