Meksikanın Qvadalaxara şəhərində keçirilən Qran-pridə qızıl medal qazanan Azərbaycan cüdoçusu Balabəy Ağayev Beynəlxalq Cüdo Federasiyasının (IJF) rəsmi saytına müsahibə verib.
Prosport.Az həmin müsahibəni təqdim edir:
- Siz təkcə qalib gəlmədiniz, turnirdə bütün görüşləri vaxtından əvvəl qazandınız. Bunu necə bacardınız?
- Öz döyüşümün keyfiyyətindən zövq aldım. Özümə inanırdım ki, çempion ola bilərəm, çünki hazırlığım çox yaxşı idi. Bundan əvvəl Braziliyada 2 həftəlik təlim-məşq toplanışı keçmişdik və bu, mənə çox kömək etdi. Qvadalaxarada səylə mübarizə apardım və bu qələbəyə layiq idim.
- Finaldakı rəqibiniz Mitçel Auqustoyla Braziliya toplanışında birgə sparrinqlər keçmisiniz. Bu, sizə braziliyalını məğlub etməkdə kömək etdimi?
- Gün ərzində bir neçə dəfə bir-birimizlə qarşılaşırdıq. Onun mənimlə, mənim də onunla güləşməyim bir qədər çətin idi. Amma buna baxmayaraq, Qran-prinin finalında Auqustoya qalib gəlməyi bacardım.
- Yəni, siz braziliyalının elə bir “sirr"ini tapmışdınız ki, məşqlərdə ondan gizlətmişdiniz?
- O, mənim soldan həyata keçirdiyim əks-hücumu gözləmirdi. Yəqin düşünürdü ki, məşqlərdə istifadə etdiyim klassik tutuşları tətbiq edəcəyəm, amma mən Auqustoya sürpriz etdim.
- Deməli, belə tərzdə qalib gəlməyin, yəni, gözəl qələbənin ayrıca bir zövqü var?
- Bu, möhtəşəm hissdir. Cüdoda yeniliklər tətbiq edirsən, onlar nəticə verir və bundan zövq alırsan. Belə uğurun dadı ikiqat şirin olur. Qarşıdakı yarışlarda da mübarizə tərzimə bu cür elementlər əlavə etməyə çalışacağam, yeni taktiki həllər üzərində işləyəcəyəm.
- Qvadalaxaradakı çıxışla Azərbaycan komandası Amerika qitəsindəki turunu başa vurdu. Demək olarmı ki, uyğunlaşma uğurlu keçdi?
- Mən Limadakı Qran-prini buraxdım və yalnız Meksikada çıxış etdim. Bakı ilə saat fərqi çox olduğuna görə çıxış etmək bir qədər çətin idi. Final görüşlərinə çıxanda, Bakıda artıq gecə yarısı idi. Amma belə şəraitdə qalib gəlmək daha xoş oldu, yarışın atmosferi mənə çox xoş təsir bağışladı.
- Qələbənizi necə qeyd etdiniz?
- Evə zəng etdim, ailəmlə danışdım. Onları sevindirdiyim üçün çox xoşbəxtəm.