"Özümü əla hiss edirəm. Elə bil hər şeyi sıfırdan başladım və bundan sonra davamı gələcək".

Prosport.Az xəbər verir ki, bu sözləri Meksikanın Qvadalaxara şəhərində keçirilən Qran-pridə qızıl medal qazanan Azərbaycan cüdoçusu Hidayət Heydərov (73 kq) "Judo TV"yə açıqlamasında deyib.

Olimpiya çempionu uğurlu çıxışını şərh edib: "Bu, idman formam itirdiyim ilk belə hal deyil. Uğurdan sonra bəzən uğursuzluğa düçar oluram, amma sonra yenidən zirvəyə qayıdıram. Hətta dünya çempionatında uduzanda da bilirdim ki, yenə zirvəyə qayıdacağam. Peşəkar idmanda enişlər və yüksəlişlər olur - sən ya zirvədəsən, ya da enişdəsən. Açığı, eniş dövrünə görə çox da narahat olmuram. Mən olimpiya, dünya və Avropa çempionuyam və yenidən zirvəyə qayıdacağıma əminəm. Bütün bu tənqidlər isə məni sadəcə motivasiya edir. Mən bunu sevirəm".