Meksikanın Qvadalaxara şəhərində təşkil olunan Qran-pri turnirinin 2-ci günündə milli komandamız aktivinə daha 3 medal yazdırıb. 

Prosport.Az xəbər verir ki, olimpiya çempionumuz Hidayət Heydərov (73 kq) və 81 kq çəki dərəcəsində mübarizə aparan Vüsal Qələndərzadə bütün görüşlərdə qələbə qazanaraq Dünya Cüdo Turu Seriyasına daxil olan yarışda çempionluq sevinci yaşayıb.

Hidayət Heydərov həlledici görüşdə çexiyalı Xusniddin Karimovu, Vüsal Qələndərzadə isə finlandiyalı Eetu İhanamakini məğlub edib. Bu, Olimpiadadan sonra Hidayətin ilk qızıl medalı olub. Rəşid Məmmədəliyev (73 kq) isə beynəlxalq turnirin bürünc medalını boynundan asıb.

Qeyd edək ki, daha əvvəl Qvadalaxara Qran-Prisində Balabəy Ağayev (-60 kq) və Ruslan Paşayev (-66 kq) qızıl, Əhməd Yusifov (-60 kq) isə bürünc mükafata sahib çıxıb. 

Hesabında 4 qızıl və 2 bürünc medal olan Azərbaycan ümumi komanda sıralamasında liderliyini qoruyub.