Ermənistanda keçiriləcək ağırlıqqaldırma üzrə Avropa çempionatında Azərbaycan idmançılarının iştirakına yarış təşkilatçıları təhlükəsizliyə dair zəmanət məktubu təqdim edib.

Bu barədə Prosport.Az-a Azərbaycan Ağır Atletika Federasiyasının mətbuat xidmətinin rəhbəri Kənan Məstəliyev məlumat verib:

"Hazırda yarışda iştirakımıza bir maneə yoxdur. Qarşı tərəfdən öncədən təhlükəsizlik təminatı almışıq. Əlavə məlumat gedişatda veriləcək".

Qeyd edək ki, yığmamız 15-23 aprel tarixlərində  Ermənistanın paytaxtı İrəvanda keçiriləcək qitə birinciliyində 4 idmançı ilə təmsil olunacaq.

Kişilərin mübarizəsində İsa Rüstəmov (67 kq), Ömər Cavadov (73 kq) və Əli Şükürlü (102 kq), qadınların yarışında isə Nazilə İsmayılova (49 kq) çıxış edəcək.

Qeyd edək ki, Avropa çempionatı aprelin 15-dən 23-dək keçiriləcək. Açılış mərasimi aprelin 14-də olacaq.