Azərbaycana III MDB Oyunlarında qızıl medal qazandıran karateçilərdən sonuncusu Fərid Ağayev oldu. 75 kq çəki dərəcəsində çıxış edən 23 yaşlı idmançı yarışdığı B qrupunda məğlubiyyətlə başladı. O, Kuvonçbek Muxamadiyevə (Özbəkistan) 7:8 uduzdu. Lakin daha sonra toparlandı. Qadji Qadjiyevlə (Rusiya) 3:3, Şınqqıs Tailiyevlə (Qazaxıstan) 6:6 hesablı qələbələr (Senşu xalını qazandığı üçün) onu qrupdan çıxardı. Nazim Nurlanovla (Qırğızıstan) yarımfinal görüşündə 2:6 hesabı ilə məğlub olsa da, rəqibin son saniyədə xəbərdarlıqla məğlub elan edilməsi onun finala adlamasına səbəb oldu. Finalda isə Şınqqıs Tailiyevi 6:5 məğlub etməklə çempion oldu.
Prosport.Az-ın Mingəçevirə ezam olunmuş əməkdaşı Fərid Ağayevdən müsahibə götürüb.
– Yarışla bağlı fikirlərinizi bildirərdiniz...
– Gənclər və İdman Nazirliyinə belə yüksək səviyyədə yarış təşkil etdiyi üçün təşəkkürümü bildirirəm. Bu yarışa çox ciddi hazırlaşmışdıq. Qrupda özbək, rusiyalı və qazaxıstanlı idmançılarla qarşılaşdım. Yarımfinalda Qırğızıstan idmançısını məğlub etdikdən sonra yenidən qazax karateçi ilə görüşdüm və finalda onu da yendim.
– Finalda qazaxıstanlı idmançı sizi məğlub edirdi. Lakin son saniyədə aldığınız xal sizi çempion etdi. Bu barədə nə deyə bilərsiniz?
– Döyüş hər zaman sonadək aparılmalıdır. Hər zaman sonadək döyüşmüşəm. Mübariz insanam. Qazaxıstanlı idmançı vaxtından erkən sevinsə də, son saniyədə başa ayaqla zərbə vurub qalib oldum.
– Növbəti hədəfiniz hansıdır?
– Parisə gedib dünya çempionatına lisenziya qazanmağa çalışacağam. Daha sonra İslam Həmrəyliyi Oyunlarında qatılacağam.
– Məşqçiniz Rafael Ağayev də sizə zaldan dəstək olurdu. Onun olması nə dərəcədə motivasiya verir?
– Müəllimim kimi mənim də soyadım Ağayevdir və 75 kq-da döyüşürəm. Rafael Ağayevdən sonra bu çəkinin yükünü indi mən daşıyıram. Tatamiyə çıxanda müəllimin gücünü hiss edirəm. "Qara brilyant"ın zalda olması mənə motivasiya verir. Namiq müəllim də mənim üzərimdə az əziyyət çəkməyib. Bütün müəllimlərimə və federasiya prezidenti Ülvi Quliyevə təşəkkür edirəm.
– Rafael Ağayevin ləqəbi bəllidir. Bəs sizdə?
– Hələ heç bir ləqəbim yoxdur. Məşq yoldaşlarım "Ağayev" deyə çağırır. Amma ümid edirəm ki, ən azı "Ağ brilyant" ola bilərəm.
Səbuhi Musa