Cüdo üzrə Azərbaycan milli komandasının oktyabrın 11-13-də Perunun paytaxtı Lima şəhərində keçiriləcək Qran-Pri turniri üçün heyəti açıqlanıb.

Prosport.Az xəbər verir ki, yarışda ölkəmizi 9 çəki dərəcəsində 17 cüdoçu (14 kişi, 3 qadın) təmsil edəcək.

Kişilərin mübarizəsində Turan Bayramov, Əhməd Yusifov (hər ikisi 60 kq), Ruslan Paşayev, Rəşad Yelkiyev (hər ikisi 66 kq), Hidayət Heydərov, Rəşid Məmmədəliyev (hər ikisi 73 kq), Vüsal Qələndərzadə, Ömər Rəcəbli (hər ikisi 81 kq), Vüqar Talıbov, Murad Fətiyev (hər ikisi 90 kq), Zelim Kotsoyev, Əjdər Bağırov (hər ikisi 100 kq), Uşanqi Kokauri və Kənan Nəsibov (hər ikisi +100 kq) qüvvəsini sınayacaq.

Qadınların yarışında isə Könül Əliyeva (48 kq), Xədicə Qədəşova və Aydan Vəliyeva (hər ikisi 52 kq) tatamiyə çıxacaq.

Qeyd edək ki, 3 gün davam edəcək turnirdə 49 ölkədən 293 idmançı (172 kişi, 121 qadın) iştirak edəcək.