Azərbaycan cüdoçuları Göygöl Olimpiya İdman Kompleksində keçirilən III MDB Oyunlarında 4-5 oktyabrda 6 qızıl, 7 gümüş və 9 bürünc medal qazandılar. Bununla da cüdo ölkəmizə ən yüksək əyarlı medalları qazandıran idman növü oldu.
Yarış yekunlaşdıqdan sonra Prosport.Az-ın Göygölə ezam olunmuş əməkdaşı Azərbaycan Cüdo Federasiyasının icraçı vitse-prezidentidən müsahibə götürüb.
– 22 medal qazandınız. Bunların 6-sı qızıl, 7-si gümüş və 9-u bürünc medal oldu. Hazırda Azərbaycan üçün ən yaxşı nəticəni cüdo göstərib. Bəs yarışı sizin üçün qənaətbəxş saymaq olar?
– Nəticələri normal qiymətləndirirəm. Fərdi yarışlarda 5 qızıl, 7 gümüş və 9 bürünc medal oldu. Bəzi çəkilərdə daha da yaxşı nəticəmiz ola bilərdi. Çempionluğuna ümid etdiyimiz uşaqlardan bəziləri aşağı nəticə göstərdi. Əvəzində digər çəkilərdə uşaqlar daha yaxşı çıxış etdi. MDB Oyunları bu yaş qrupunun 4-cü böyük yarışı idi. Son 4 ay ərzində Avropa birinciliyi, Avropa Gənclər Olimpiya Festivalı və dünya çempionatında yarışmışdılar. Bu psixoloji yükü çəkmək heç də asan deyil. MDB Oyunlarına hazırlananda uşaqların tükəndiyini görürdük. Hətta qızların təlim-məşq toplanışını ləğv etdik. Çünki çox yorulmuşdular. Bu yaş qrupu üçün bu qədər yüklənmənin öhdəsindən gəlmək çətindir. İdmançıların böyük əksəriyyəti üçün bu, yeniyetmə kateqoriyasında sonuncu yarış idi. Onların çoxu növbəti ildən gənclər kateqoriyasına keçəcək. Ona görə də "qapını bərk çırpmaq" şansları var idi. Bunu da dəyərləndirdilər. Ümumilikdə gözlədiyimiz nəticəni ala bildik, bundan razıyıq.
– Hansı idmançılar gözlədiyiniz nəticələri göstərmədi?
– 50 və 55 kq çəki dərəcələrində Anar Quliyev, Məhəmmədəli Hüsüyev, Hüseyn Hüseynovdan qızıl medal gözləyirdik. İdmandır, belə olur. Əvəzində qızlarda 44, 48 və 52 kq çəki dərəcələrində qızıl medalımız oldu. 66 kq-da 2 idmançımızın finala çıxması bizim üçün sürpriz oldu.
– Cüdonun cəmi 2 günə sığışdırılması, 1 gün bütün çəki dərəcələri üzrə fərdi yarışların keçirilməsi sizin üçün çətinlik yaratmadı?
– Xeyr, təşkilati baxımdan heç bir çətinlik yaratmadı. Zarafatla deyirəm, lazım olsa, komanda yarışlarını da 1 gündə keçirərdik (gülür). Biz buna hazır idik. Əsas odur ki, bu barədə qərar vaxtında verildi və bütün komandaların diqqətinə çatdırıldı. Hamı da ona görə işini planlaya bildi.
– Rusiyalı idmançılarla qarşılaşmaq idmançılarımız üçün də yeni təcrübə oldu deyə bilərik?
– 2023-cü ildən onlarla qarşılaşırıq. Rusiyalı idmançılar ötən və bu il Azərbaycanda keçirilmiş yeniyetmələrin Avropa Kubokunda da iştirak edib. Məsələn, buradakı heyətin minimum 50-60%-i bu il Qubada keçirilmiş Avropa Kubokunda vardı. Sadəcə, MDB Oyunlarında Rusiya öz adı ilə çıxış edə bilirdi.
– Qarışıq komanda idman növlərinin mükafatlandırması zamanı Azərbaycan Qılıncoynatma Federasiyasının prezidenti Fikrət Zeynalovun iştirak etməsi marağımıza səbəb oldu. Qılıncoynatma hara, cüdo hara?
– Bu, protokol qaydalarıdır. Fikrət müəllim bizim yaxın dostumuzdur, cüdoda əməyi olan şəxsdir. Uzun müddət Meksika və Misir cüdo millisinin baş məşqçisi olub. Özü cüdo üzrə məşqçidir. Sadəcə, indi Qılıncoynatma Federasiyasında çalışır. Bizə dəstək olmağa gəlmişdi.
– Perunun paytaxtı Limada gənclərin Avropa çempionatı keçirilir. Bir gözünüz həm də orada olmalıdır. Ora az heyətlə yollanmağımız nə ilə bağlıdır?
– Kim dünya çempionatına hazır idisə, onlar ora aparılıb. Ötən ay Slovakiyanın paytaxtı Bratislavada keçirilmiş Avropa çempionatında bəzi idmançıların zəif çıxış etməsi də buna təsir etdi. Maliyyə problemimiz yoxdur. Lazım gəlsə, tam heyətlə də ora yollanardıq. Performans direktoru və baş məşqçilərin ümumi qərarına əsasən az heyətlə ora idmançı göndərməli olduq. Ona görə də qarışıq komanda yarışında iştirak etməyəcəyik.
Səbuhi Musa