III MDB Oyunlarında çıxış edən U-17 oğlan voleybol milli komandamız turnirə Qırğızıstan üzərində 3:0 hesablı qələbə ilə başladı.
Prosport.Az-ın Gəncəyə ezam olunmuş əməkdaşı millimizin baş məşqçisi Cahangir Seyid Abbasidən müsahibə götürüb.
– İlk oyunda Qırğızıstan millisini 3:0 məğlub etdiniz. Oyunla bağlı nə deyə bilərsiniz?
– I seti normal oynadıq. Daha sonra uşaqlar stres altında oynadı. Kapitanımız xəstə idi, onu dərmanla oyuna hazır etdik. Xüsusən III seti yaxşı oynamalı idik. Ancaq voleybola yeni başlamışıq deyə, uşaqların təcrübəsizliyi öz sözünü dedi. III set uzandı. Amma uşaqlar sonda özlərini kontrol edib, vacib xalları qazandı. Ümid edirəm ki, növbəti görüşlərdə daha az səhvlər edərlər.
– II setdə qırğızlar önə də keçdi. III setdə isə bizimlə başabaş oynadılar. İlk setdə asan qələbə və rəqibin adının Qırğızıstan olması sonrakı setlərdə arxayınlaşmaya səbəb ola bilərmi?
– Bütün komandalara hörmətimiz var. Qırğızıstanın bu yaşda oğlan liqası var. Rəqibin kim olmasından asılı olmayaraq, hamısına hörmət etməliyik. Mənə elə gəlir ki, burda təcrübəsizlik rol oynadı. Cəmi 14 aydır ki, biz bu işə başlamışıq. Bir məqamı da qeyd edim ki, burada ən gənc komanda bizik. 14 oyunçudan 9-u 2009 təvəllüdlüdür. Halbuki bu yarışlar 2008 təvəllüdlü uşaqlarla keçirilir. Digər komandalarda bizim qədər 2009 təvəllüdlü oyunçu yoxdur. Bizim ilk beynəlxalq yarışımızdır. Halbuki Qırğızıstan Asiya çempionatında çıxış edir. Dəstəyə görə federasiya və "Sumqayıt Regional" voleybol klubunun rəhbərliyinə təşəkkürümü bildirirəm. Uşaqlar 14 aydır ki, ailələrini düzgün görə bilmir. Onların fikri ancaq voleyboldadır.
– Qızların turnirindən fərqli olaraq, oğlanların yarışında qrup yox, dövrəli sistemdir. Qrupda mübarizə aparmaq, yoxsa bütün rəqiblərlə qarşılaşmaq yaxşıdır?
– Qrup şəklində olsaydı, bizim finala çıxmaq şansımız daha çox olardı. Çünki ilk dəfə qrup şəklində olanda Türkmənistan, Tacikistan və Qırğızıstan bizimlə birgə idi (daha sonra Türkmənistan voleybol yarışından imtina edib – red.). Rusiya, Belarus və Özbəkistan bizim rəqibimiz deyildi. O qrupda olsaydıq, minimum 3-cü yeri tuta bilərdik. Rusiya və Belarus voleybol ənənələrinə malik ölkələrdir. Özbəkistan Asiya çempionatına ev sahibliyi edən ölkədir. Buna da müsbət yanaşıram. Çünki güclü komandalarla qarşılaşıb, çox böyük təcrübə əldə edəcəyik.
– Bu komanda həm də Azərbaycan çempionatında "Gənclər" adı ilə debüt edəcək. MDB Oyunları bu baxımdan sizin üçün hazırlıq olacaq...
– 100%. 1 ay sonra EEVZA (Şərqi Avropa Voleybol Zona Assosiasiyası) yarışlarına qatılacağıq. Federasiya rəhbərliyi qərar qəbul edib ki, Yüksək Liqada Sumqayıtda məskunlaşaraq çıxış edək.
Səbuhi Musa