Azərbaycan dünən III MDB Oyunlarında taekvondo və samboda ilk qızıl medallarını qazandı. Ümumiyyətlə, dünən qazanılan 11 medal taekvondonun payına düşdü.
Prosport.Az-ın Mingəçevirə ezam olunmuş əməkdaşı Azərbaycan Taekvondo Federasiyasının vitse-prezidenti Hikmət Səmədovdan müsahibə götürüb.
– Ümumilikdə nəticələr barədə nə deyə bilərsiniz?
– U-21 millimiz təlim-məşq toplanışlarına qatılmışdı, turnirlərə yollanmışdı. Qarşımıza məqsəd qoymuşduq ki, hədəflərimizə çataq. Hədəfimiz doğma ana Vətəndə Azərbaycan bayrağını qaldırmaq, himnimizi səsləndirmək idi. Qurulan planlarımız çox uğurla həyata keçdi. Buna görə çox sevinirik.
– Taekvondo ilk dəfə III MDB Oyunlarına salınmışdı. Ümumiyyətlə, bu yarışda Azərbaycanın ilk qızıl medalının taekvondodan gəlməsi də sizin üçün ikiqat sevinc sayıla bilər?
– Bəli, tamamilə düzgün qeyd edirsiniz. Biz III MDB Oyunlarında ilk qızıl medalın taekvondodan gəlməsi bizi ikiqat sevindirdi. Ümumilikdə, ilk gündə 3 qızıl, 2 gümüş və 6 bürünc medal qazanmaq əla nəticədir. Bu da o deməkdir ki, ilk gündə dayanq üzərinə çıxan 14 idmançımızdan 11-i medal qazandı.
– Sonuncu – 2 il əvvəl Bakıda keçirilmiş böyüklərin dünya çempionatında fiasko olmuşdu, medal qazana bilməmişdik. 24-30 oktyabrda Çinin Usi şəhərində böyüklərin dünya çempionatı olacaq. Orada hədəflər nə olacaq?
– Biz federasiya olaraq uzun müddətdir ki, bu dünya çempionatına hazırlaşırıq. Ümid edirik ki, orada da nəticələrimiz yaxşı olacaq. Siz yaxşı bilirsiniz ki, idmanda zədələrə və obyektiv səbəblərə görə medalsız qalmaq mümkündür. Ancaq "döyüş meydanı"nda idmançılarımız həmişə əlindən gələni əsirgəmir. Onların dünya çempionatında medal qazanmaq potensialı da var. İdmançılarımız kifayət qədər təcrübəlidir, beynəlxalq turnirlərdə iştirak ediblər. Dünya çempionatına hazırlıqlar kifayət qədər uzun olub.
– İl boyu göstərilən nəticələrə əsasən konkret olaraq ad çəkmək olarmı ki, bu idmançılardan medal gözlənilir?
– Xeyr, indidən bu adları açıqlayıb, hadisələri qabaqlamaq istəmirəm. Ümid edirəm ki, nəticələrimiz yaxşı olar.
Səbuhi Musa
