Azərbaycan Voleybol Federasiyasının İdarə Heyətinin yeni üzvlərinin adları bilinib. Bunlar Zaur Axundov, Elçin Ağakişiyev, İlqar Nuriyev, Elqar Bağırov və Günay Salamovadır.

2021-ci ilin 26 noyabrında İdarə Heyətinə seçilmiş Nicat Quliyev və Kamal Hüseynli bu vəzifədən uzaqlaşdırılıb. Bəs yeni üzvlər kimlərdir?

Prosport.Az bu suala aydınlıq gətirməyə çalışıb.

Zaur Axundov "Silk Way Holding" MMC-nin sədridir. Bu şəxs futbol ictimaiyyətinə yaxşı tanışdır. AZAL rəhbəri Cahangir Əsgərovun yaxın adamı sayılan Zaur Axundov vaxtı ilə Azərbaycan Premyer Liqasında "Olimpik", "Olimpik Şüvəlan" və AZAL adları ilə fəaliyyət göstərmiş futbol klubunun prezidenti olub.

Elçin Ağakişiyev SOCAR prezidenti Rövşən Nəcəfin müşaviridir.

İlqar Nuriyev tikinti şirkəti olan "Ximekspress – 2000"in təsisçisidir. O da əvvəl Sumqayıtın "Gənclərbirliyi" klubunun rəhbəri olub.

Elqar Bağırov marketinq kommunikasiya agentliyi olan "Times Consulting" şirkətinin rəhbəridir.

Günay Salamova Dövlət Gömrük Komitəsində şöbə rəisidir.

Səbuhi Musa