Daha əvvəl bildirdiyimiz kimi, Azərbaycan Ağırlıqqaldırma Federasiyasının gördüyü işlər gözə kül üfürmək kimi bir şeydir. Nəticələr çox zəif, keçirilən ölkə çempionatlarının səviyyəsi olimpiya idman növünə yaraşmayacaq durumdadır. Azərbaycan Sənaye Korporasiyası bağlandıqdan sonra maliyyəsi köklü şəkildə azalan federasiyanın rəhbərliyi artıq yalnız beynəlxalq qurumlarda təmsil olunmaqla işinin yekunlaşdığını zənn edir.
Ancaq narazılıqlar kifayət qədərdir. Bu narazılardan biri də 68 yaşlı Hikmət Tarıverdiyevdir.
SSRİ idman ustası, Azərbaycan Respublikasının fəxri bədən tərbiyəsi və idman işçisi, ağırlıqqaldırma üzrə 12 dəfə Azərbaycan çempionu, 4 dəfə Bakı çempionu olmuş Hikmət Tarıverdiyev Prosport.Az-ın redaksiyasına narazılığını bildirib.
Onun sözlərinə görə, Ağırlıqqaldırma Federasiyasının sabiq prezidenti İnam Kərimov tərəfindən Şamaxıda açılmış "Cəngi" klubu yeni rəhbərliyin gəlişindən sonra fəaliyyətini dayandırıb:
"2008-ci ildən 2018-ci ilədək ağırlıqqaldırma idman növünü "AAAF Park" şirkəti maliyyələşdirirdi. Onun rəhbəri Tofiq Heydərov çox gözəl şərait yaratmışdı. 2022-ci ildə o vaxt kənd təsərrüfatı naziri işləyən İnam Kərimov Azərbaycan Ağır Atletika Federasiyasının prezidenti seçildi. Onun vasitəçiliyi ilə Şamaxıda "Cəngi" klubu yaradıldı. Şamaxıya gəlib bu klubun açılışını da etmişdi. Burada ağırlıqqaldıma üçün münbit şərait yaratmışdı. Mən də bu klubda tələbələrimə məşq keçirdim. Daha sonra o, Ali Məhkəməyə hakim gedincə, federasiya prezidenti vəzifəsi boş qaldı. Bundan bir müddət sonra Azərbaycan Sənaye Korporasiyasının rəhbəri Kamran Nəbizadəni prezident seçdik. Güləşdən gələn, ağırlıqqaldıma idmanına aid olmayan Firdovsi Umudov da vitse-prezident oldu. Kamran Nəbizadə də kənd təsərrüfatı mütəxəssisidir. Dedik ki, eybi yoxdur, təki iş getsin. "Cəngi" klubu onlar gələndən bağlandı. Klubun rəhbəri Rüfət Məmmədov bildirdi ki, artıq İnam Kərimov yoxdur deyə, maliyyəmiz kəsilib. Nə Kamran Nəbizadə, nə də Firdovsi Umudov 2 ildir ki, bu vəzifədə olsalar da, Şamaxıda ağırlıqqaldırmanın inkişafı üçün bizə kömək etmir. Ağırlıqqaldırmanın Şamaxı şəhərində ənənələri olub. Ancaq indi burada federasiya rəhbərliyinin yarıtmaz işi sayəsində heç bir klub qalmayıb, bütün mütəxəssislər Şamaxını tərk edib".
Hikmət Tarıverdiyevin sözlərinə görə, keçirilən ölkədaxili yarışlarda idmançıların sayı az olur, kütləvilik çox aşağı səviyyədədir:
"Sonuncu gənclərin ölkə birinciliyində 48 idmançı iştirak edib. Az qala hakim belə idmançıdan çox olub. 32 hakim yarışda iştirak edib. Bu, olimpiya idman növü olan ağırlıqqaldırmanı məhv etmək deməkdir. Görəsən, ermənilərin ağırlıqqaldırma komandasının idmançılarına bizim atletlər uduzanda federasiya rəhbərliyinin ürəyi ağrımır?".
Qeyd edək ki, gələcəkdə bu mövzuya yenidən qayıdacağımız istisna edilmir.
Səbuhi Musa