"Bildiyiniz kimi, mən olimpiya və paralimpiya yığma komandasında bir necə cüdoçuların şəxsi məşqçisiyəm. Məşqçilik karyeramda bir çox Avropa və dünya birinciliklərinin, çempionatlarının qalib və mükafatçılarının yetişməsində böyük işlər görmüşəm. Eləcə də Tokio-2021 Yay Paralimpiya Oyunlarında 48 kq çəki dərəcəsində qızıl medal qazanan paracüdocu Şəhanə Hacıyevanın müəllimiyəm".
Bunu Prosport.Az-a açıqlamasında tibbi təsnifatdan keçə bilmədikləri üçün builki dünya və Avropa çempionatlarına buraxılmayan Şəhanə Hacıyeva və İlkin Nəsibovun şəxsi məşqçisi Fərid Ağakişiyev deyib.
Saytımızda "Daha bir paracüdoçumuzun gözləri görürmüş – Avropa çempionatına buraxılmayıb" yazısı getdikdən sonra Fərid Ağakişiyev redaksiyamızla əlaqə saxlayıb. Adının hallandığına görə, o, məsələyə aydınlıq gətirməyə çalışıb. Jurnalistika prinsiplərinə əsasən onun fikirlərini təqdim edirik:
"Uzun illərdir ki, Əmək və Əhalinin Sosial Müdafiəsi Nazirliyinin (ƏƏSMN) tabeliyində Sosial Xidmətlər Agentliyinin nəzdində fəaliyyət göstərən Sumqayıt Paralimpiya Mərkəzində əngəlli uşaq oğlan və qız idmancılara məşqlər keçirilir. Bu mərkəzdə əngəlli uşaqlara bir cox idman növündə dərslər də verilir.
Eləcə də mən görmə əngəlli uşaqlara, oğlan və qızlara cüdo idman növündə dərslər keçirəm. Görmə əngəlli uşaqlar müvafiq sənədləri, görməsi ilə bağlı əlilliyi, tibbi rəyləri və eləcə də sağlamlığı ilə bağlı həkim rəyini təqdim etdikdən sonra məşqlərə buraxılır və biz də qəbul edirik. Ola bilsin ki, dövlətimiz tərəfindən verilən tibbi sənədlə paracüdoda tələb olunan tibbi sənəd üst-üstə düşmür. Biz dövlət tərəfindən verilən sənədə əsaslanaraq onlara məşq keçirik. Burada şəxsi məşqçinin heç bir günahı yoxdur.
Sözügedən İlkin Nəsibov da uşaq yaşlarından görmə əngəlli paracüdoculardan biridir. O, uşaq yaşlarından – 9 yaşından bizim mərkəzdə məşqlərə başlayıb və dəfələrlə Uşaq Paralimpiya Oyunlarının qalibi olub. ƏƏSMN qurumlarının təyin etdiyi 2-ci qrup görmə əlilliyi olan təqaüdçüdür. Bu cür görmə əlilliyi olan uşaqların tərəfimizdən cəmiyyətə inteqrasiyası ücün, həyat eşqi ilə yaşamaqları, depressiyaya düşməməkləri, özlərinə qapanmamaları və kollektivdə böyümələri üçün var gücümüzlə çalışırıq. Bizdə onlarla belə əngəlli uşaqlar var. İlkinin də belə kollektivdən çıxması təsadüfi deyil. Onu da qeyd etmək istəyirəm ki, mərkəzdə İlham Zəkiyev kimi idmancılar məşq edir və yeni yetişən paracüdoculara mənəvi güc almasına təkan verir.
Artıq İlkin Nəsibovun da böyük idmanda özünü sınaması, Tbilisidə beynəlxalq təsnifatdan keçməsi ücün Milli Paralimpiya Komitəsi IBSA-ya müraciət edib idmançını Avropa çempionatına apardı. O ilk dəfə təsnifatda iştirak etdiyi ücün təsnifata lazım olan sənədlərin tam olmadığı məlum oldu və yarışa buraxılmamasına qərar verildi. Növbəti təsnifata müraciət etmək üçün tam şəkildə sənədlərinin hazırlanması bildirildi.
Onu da bildirmək istəyirəm ki, yerlərdə şəxsi məşqçilərin işləri idmançıların yetişməsini təmin etməkdir. Təsnifat, paracüdo qaydalarına dəyişikliklər, həkim rəyləri – bu kimi məsələlər şəxsi məşqçilərin məsuliyyəti deyil. İstərdim ki, hətta dəvət edirəm ki, yerlərdə yetişən uşaq paracüdocuların məşqlərində iştirak edib özlərindən, əngəllərindən, durumlarından geniş müsahibə alasınız və onların nə qədər həssas, duyğusal olduqlarını işıqlandırasınız".
