Azərbaycanın gənc cüdo millisinin Perunun paytaxtı Limada keçiriləcək dünya çempionatında iştirak edəcək heyəti bəlli olub.

Prosport.az xəbər verir ki, yığmamız mötəbər yarışda ümumilikdə 5 çəki dərəcəsində 8 idmançı ilə (6 oğlan, 2 qız) təmsil olunacaq.

Cüdoçularımıza gənc oğlanlardan ibarət yığmanın baş məşqçisi Rüstəm Alimli, məşqçi Elxan Rəcəbli, gənc qızlardan ibarət yığmanın baş məşqçisi Amina Abdellatif, böyük məşqçi Zaşa Herkenrat-Vimar rəhbərlik edəcək.

Oğlanlar arasında Nihad Məmişov, Fərid Qarayev (hər ikisi 60 kq), Məhəmməd Musayev, Nizami İmranov (hər ikisi 66 kq), Süleyman Şükürov, (81 kq) və Ramazan Əhmədov (+100 kq) qalib olmaq üçün mübarizə aparacaq. Bu ay Slovakiyanın paytaxtı Bratislavada keçirilmiş Avropa çempionatına yollanan heyətdən Əbil Yusubov (73 kq), Aslan Kotsoyev (90 kq) və Davud Namazlı (100 kq) bu dəfə heyətdən kənarda qalıb.

Qızların yarışında isə Xədicə Qədəşova və Aydan Vəliyeva (hər ikisi 52 kq) fəxri kürsüdə yer almağa çalışacaq. Bratislavada iştirak etmiş Fəridə Mirzəyeva (48 kq) və Nigar Süleymanova (+78 kq) bu dəfə heyətdə yoxdur.

Bu o deməkdir ki, Avropa çempionatından fərqli olaraq, dünya çempionatında Azərbaycan qarışıq komanda yarışında iştirak etməyəcək.

Qeyd edək ki, oktaybrın 5-dən 8-dək keçiriləcək dünya çempionatında 66 ölkədən 454 idmançı (242 oğlan, 212 qız) mübarizə aparacaq.