"Qarabağ"ın 19 yaşadək komandası (U-19) bu gün Bakı vaxtı ilə saat 14:00-da UEFA Gənclər Liqası çərçivəsində Portuqaliya nəhənglərindən olan "Benfika"nın müvafiq kollektivi ilə üz-üzə gələcək.
Bu münasibətlə Prosport.Az "Qarabağ"ın baş məşqçisi Rəşad Sadiqovdan müsahibə götürüb:
– "Benfika" ilə oyuna komandanı necə motivasiya edə bildiniz?
– Açığı, belə komandaya qarşı uşaqlara motivasiya verməyə ehtiyac belə yoxdur. Çünki futbolçular da bilir ki, bura artıq UEFA Gənclər Liqasıdır. Ona görə də uşaqlar oyuna motivasiya olaraq hazırdır.
– "Benfika"nın U-19 komandasının son oyunlarını izləmək imkanınız olub?
– 10 gün qabaq bir turnirdə iştirak ediblər. Açığı, matçlarda fərqli heyətləri oynadırlar. Ona görə də çox şeyi analiz etmək olmur. "Benfika" bizim üçün bağlı qutudur. Gah 4-lü, gah da 5-li müdafiə ilə oynayırlar. Üstünlük verdikləri sistem bəlli deyil. "Benfika" U-19-nun həm A, həm də B komandası var. U-23 komandasında çıxış edən futbolçuları mövcuddur. Ona görə də onların start heyətini müəyyənləşdirmək də bizə çətindir. Belçikadan, İrlandiyadan legionerləri də var.
– Qeyd etdiyiniz beynəlxalq turnirdə nəticələri necə olub?
– Turnirda "Barselona"ya 1:3 uduzmuşdular. Çempionatın son turunda 2:2 oynamışdılar. 2022-ci ildə UEFA Gənclər Liqasında "Benfika" çempion olub ("Zalsburq"a 6:0 qalib gəliblər, bundan əvvəl daha 3 dəfə də final oynayıblar – S.M.). Burada Akademiyada da deyirlər ki, "Benfika"nın U-19 komandasına düşmək çətindir. Rotasiya imkanları genişdir.
– "Qarabağ"ın əsas komandası ilə məşqlərdə iştirak edən Amin Rzayevlə Hikmət Cəbrayılzadənin "Benfika" ilə matçda sizə kömək etmək şansı var?
– Amin bu dəqiqə həm Əvəzedicilər Liqasında, həm də U-19 Liqasında çıxış edir. Son 7-10 gündür ki, bizimlə məşq keçir. Hikmət isə əsas komanda ilə məşqləri edir. Amma "Benfika"ya qarşı matçda Qurban Qurbanov onu bizim sərəncamımıza buraxacaq.
– İyulda İsveçdəki beynəlxalq turnirdə rəqiblərin səviyyəsi bu formada olmasa da, oradakı iştirak nə dərəcədə komandaya fayda verəcək?
– Açığı, oradakı rəqiblər də Avropadakı komandalardan səviyyəsinə görə heç də geri qalmırdı. Nigeriya, Qananın çempionları neçə ildir ki, orada qalib olur. O turnir bizim üçün yaxşı təcrübə oldu. Böyük stadionlarda belə rəqiblərlə oyunlardan futbolçularımız nələrisə öyrəndi. Özlərinə inam, təcrübə qazandılar. İnanıram ki, UEFA Gənclər Liqasının oyunları zamanı komandaya faydası da dəyəcək.
– Reqlamentə əsasən, UEFA Çempionlar Liqasında əsas komandanın çıxış edəcəyi son 2 komandanın U-19-u ilə siz oynaya bilməyəcəksiniz. "Liverpul"a qarşı oynaya bilməmək, yaxşı təcrübə qazanmaq imkanından məhrum olmaq təəssüfləndirmir?
– Yox. Çünki oynayacağımız 6 komandanın hər biri güclüdür. Akademiya baxımından "Çelsi" "Liverpul"dan da üstündür. "Ayaks" bu yaxınlarda beynəlxalq turnirdə böyük hesablı qələbələr qazanıb. Amma sırf adına görə Liverpul şəhərində onlara rəqib olmaq istərdik. Bununla belə, onlarla oynaya bilməyəcəyimizə görə təəssüflənmirəm. Çünki oynayacağımız 6 komanda "Liverpul"dan heç də geri qalmır.
– Bir təyyarədə səfərə yollanmısınız. Qurban Qurbanov sizə təcrübə baxımından fikirlərini, məsləhətlərini verdi?
– Hava limanında ayaq üstü söhbətimiz oldu. Ancaq bunun üçün xüsusi bir görüş keçirilməyib. Çünki onun da başı öz komandasına qarışıb. Akademiya və əsas komandanın məşq sistemi fərqlidir.
– Sonda bunu da soruşum. AFFA Gənclər Liqasının oyunlarının avrokuboka görə təxirə salınmasını istəyəcəksiniz?
– Artıq 1 oyun keçirmişik. "Araz-Naxçıvan"ı ilk turda 8:0 məğlub etmişik. Təxirə salmaq kimi bir fikrimiz yoxdur. Üst-üstə düşərsə, məcburən təxirə salınacaq. Amma belədə oynayacağıq. Çünki bizə lazımdır ki, çox oyun keçirək.
Səbuhi Musa