I Liqanın yeni mövsümünün ilk turunda səfərdə "Səbail"ə 0:2 hesabı ilə uduzan "Mingəçevir"in baş məşqçisi Ramiz Məmmədov oyundan sonra Prosport.Az-a müsahibə verib:

– "Mingəçevir" klubunda ilk məğlubiyyətinizi aldınız. Bildiyimə görə, yoxlama oyunlarında məğlub olmamışdınız. Məğlubiyyətə səbəb kimi nəyi görürsünüz?
– Deyərdim ki, oyun bərabər keçdi. Uduzulası oyun deyildi. Uşaqlar həqiqətən əzmkarlıq göstərdi. Sadəcə, qapımıza 2 zərbə oldu, 2-si də qolla nəticələndi. Bəli, 2 yoxlama oyunu keçirmişdik. Həmin matçlarla müqayisədə, bu səfər matçı idi deyəmi azca da olsa özlərini itirdilər. Verdiyimiz tapşırıqları yerinə yetirmədilər. "Səbail"i təbrik edirəm. Komandam 2-ci topları çox gec götürürdü. Rəqib isə 2-ci topların götürülməsində bizdən daha istəkli idi. Düşünürəm ki, 2-3 qol epizodunu da əldən verdik. Həm Kennet Kalunqanın, Rəhim Cəfərlinin, həm də Cona Atukveyin qol vurmaq şansları vardı, lakin fərqlənə bilmədik. Çempionat hələ təzə başlayıb. Hamıya uğurlar arzulayıram.

– İlk yoxlama oyununuzda "Karvan"a qalib gəlmişdiniz. Ola bilərmi ki, Premyer Liqa klubu üzərindəki qələbə futbolçularınızda arxayınçılıq yaratmışdı?
– Yoxlama oyunu keçirdiyimiz "Karvan" və "Zaqatala" sıradan bir komanda deyil. Gördüyünüz kimi, "Karvan" Premyer Liqada gözəl start götürüb. "Zaqatala"nın da oyunu xoşuma gəldi. Hər zaman Zaqatala futbolu sayılıb-seçilən olub. Uşaqlara xəbərdarlıq etmişdim ki, bu qalibiyyətlər bizi boşaltmamalıdır. Bir balaca diqqətli olmalıyıq. Bu arxayınlığı onlarda hiss etdiyimdən, xəbərdarlıq etmişdim. Bu matçda 2-3 futbolçumuzda az da olsa bu rahatlıq vardı. Uduzmaq problem deyil. Oyunlarımız hələ irəlidədir.

– Rəqibin heyətində Premyer Liqa təcrübəsi olan təcrübəli futbolçular – Yusif Nəbiyev, Rəhman Hacıyev, Rəşad Əzizli kimi oyunçular var idi. Ancaq demək olar ki, "Mingəçevir"də bu baxımdan axsama var...
– Demək olar ki, sıfırdan yığılan komandayıq. Müdafiə, yarımmüdafiə və hücum arasında bağlar baxımından hələ lazımi qədər təcrübə toplamamışıq. 3-4 Premyer Liqa görmüş futbolçularımız var, onlar da daha çox klublarında ehtiyatda qalmış futbolçulardır. Onlarla son anda müqavilə bağladıq. Təlim-məşq toplanışına da üzrlü səbəbdən bir az gec başladıq. Bilirik ki, toplanışa gec başlayan komanda futbolçuları yığmaqda da çətinlik çəkir. Lazım olan transferləri hələ edə bilməmişik. Bəli, legionerlər götürmüşük, deyim ki, hamısı da I Liqaya yaraşan futbolçulardır. Hamısından da demək olar ki, razı qalmışıq. "Səbail" bu baxımdan heyətinin demək olar 60-70%-ni saxlayıb. Bizdə isə ötən mövsümdən 6 futbolçu qalıb. Bunlardan da Elmin Bayramov istisna olmaqla, digərləri ötən mövsüm "Mingəçevir"in heyətində çox oynamayıb. Digərləri 3-5 matçda meydanda olub, liderlik keyfiyyətləri yoxdur, ancaq qısa zamanda öz bəhrələrini komandaya verəcəklərinə inanıram.

– Qarşıya qoyulan hədəf nədir, konkret Premyer Liqa, yoxsa...?
– Biz ancaq liderlər qrupu üçün oynayırıq. İlk gündən bunu demişəm. Son günədək də bu sözümün üstündə dayanacağam.

– Maddi baxımdan hər şey qaydasındadır?
– Heç bir problem yoxdur, hər şey qaydasındadır və yolumuza davam edirik.

Səbuhi Musa