İspaniyanın paytaxtı Madriddə kecirilen WRPF PHL ARENA adlı beynəlxalq turnirdə Azərbaycanı təmsil edən yeganə pauerliftinqçi Ramil Əhmədov xüsusi dəvət olunduğu elitar divizonda iştirak edib.

Prosport.Az xəbər verir ki, təchizatsız pauerliftinqdə idmançımız 110 kq çəki dərəcəsində 835 kq nəticə ilə 1-ci yeri tutub və mütləq qaliblər arasında 3-cü olub.

O, oturub-durma hərəkətində 312.5 kq , sinədən sıxma hərəkətində 210 kq, yerdən qaldırma hərəkətində 312.5 kq-lıq nəticə göstərib. Bununla da Ramil oturub-durma hərəkətində peşəkar idmançımız Vüsal Ağalarova məxsus olan Azərbaycan rekordunu (311 kq) yeniləyib.

Bu il 9 aylıq fasilədən sonra ilk yarışına çıxan idmançımız ötən ilin dekabr ayında keçirilən IPL Dünya Kubokunda aldığı zədələrlə bağlı 6 ay müalicə alıb. O, 3 ay olar ki, normal məşqlərə qayıdıb.

15 sentyabr – Bilik Günü münasibəti ilə bütün məktəbliləri təbrik edən Ramil Əhmədov qalibiyyətini bu gün 1-ci sinfə gedən oğlu Cəsura həsr edib.