Slovakiyanın paytaxtı Bratislavada keçirilən cüdo üzrə gənclər arasında Avropa çempionatı başa çatdı.
Prosport.Az-ın Bratislavaya ezam olunmuş əməkdaşı turnirdən sonra gənc oğlanlardan ibarət cüdo millimizin baş məşqçisi Rüstəm Alimlidən müsahibə götürüb.
– Yarışı 2 qızıl və 1 bürünc medalla bitirdiniz. Ümumiyyətlə, neçə medal gözləyirdiniz?
– Həmişə daha çox medal gözləyirik. Amma hər şey istədiyimiz kimi alınmır. Bununla belə Avropa çempionatında oğlanlarda 1-ci ola bildik. Əlbəttə, yarışın ilk günü çox möhtəşəm bir nəticə oldu və 3 medal qazandıq. Əlbəttə, 81 kq-da Avropa çempionumuz Süleyman Şükürova (gənclərin reytinqində dünyada 2-ci yerdədir) ümidimiz vardı. O bizi məyus etdi. Bir də +100 kq çəki dərəcəsində digər Avropa çempionumuz Ramazan Əhmədov ilboyu Avropa Kuboku yarışlarında yaxşı nəticə göstərmişdi (bu il 2 Avropa Kubokunun qalibi olmuş, 2 bürünc medal qazanmışdı). Ondan da medal gözləyirdik. Ancaq bu, cüdodur və belə hallar baş verir...
– Digər Avropa çempionumuz Aslan Kotsoyevin adını çəkmədiniz. Ondan bu dəfə medal gözlənilmirdi?
– Ondan da gözləyirdik. Aslan elə idmançıdır ki, hər zaman yaxşı nəticə göstərə bilər. Mayda İstanbuldakı Avropa Kubokunda qızıl, iyunda Berlindəki Avropa Kubokunda gümüş medal qazanmışdı. Amma Bratislavada güləşi alınmadı.
– Cüdo Federasiyası yarışdan öncə bəyanat yayaraq onunla millidən uzaqlaşdırılmış Tuncay Şamillə arasında olan qalmaqala münasibət bildirdi. Adının belə qalmaqalda hallanması onun psixologiyasına da təsir göstərmiş ola bilərmi?
– Hər şey ola bilər. Məşqçilərlə onun mənfi cəhətləri barədə Bakıya qayıtdıqdan sonra danışacağıq. Sonda qərara gələcəyik ki, niyə görə belə uduzdu.
– Kotsoyev İsveçrə ilə qarışıq komanda yarışında uduzduqdan sonra, digər Slovakiya və Almaniya ilə matçlarımızda yer almadı. Onun yerinə 81 çəki dərəcəsində olan Süleyman Şükürov çıxış etdi. Bu nə ilə bağlı idi?
– Çiynindən zədə aldı. Ona görə də digər görüşlərdə onu tatamiyə buraxmadıq. Ona görə də Süleymanı buraxmağa qərar verdik.
– 60 və 66 kq çəki dərəcələrində eyni səbətdə 2 cüdoçumuzun olması və nəticədə onların yolunun 1/4 finalda kəsişməsinə nə deyə bilərsiniz?
– Şimali Makedoniyanın paytaxtı Skopyedə keçirilən Avropa Kubokuna reytinqdə qalxmaq üçün getmişdik. Demək olar ki, bu bizdə alındı. Bu Avropa çempionatını Ukrayna yığması gəlməyib boykot etdi (Ukrayna Cüdo Federasiyası iyunun 1-dən Belarus millisinə öz bayrağı altında yarışmağa icazə verildiyi üçün boykot qərarı verib). Reytinqdə yüksəkdə olan idmançılar qalxdı və nəticədə 2 çəkidə cüdoçularımız eyni səbətə düşdü. Ola bilsin ki, ayrı səbətlərdə olsaydılar, finalda 2 azərbaycanlı da görərdik.
– Gələn ay Perunun paytaxtı Limada keçiriləcək dünya çempionatı barədə nə deyə bilərsiniz?
– 3 həftə sonra dünya çempionatı var. İlin ən əsas yarışıdır. Ola bilər ki, heyətdə dəyişiklik və ya azalma olsun. Buna performans direktorumuzla danışdıqdan sonra qərar verəcəyik. Əlbəttə, Avropa çempionatında medal qazana bilməyib, dünya çempionatında yaxşı nəticə qazanmaq mümkündür. Məsələn, Nihad Məmişov, Cəsur İbadlı Avropa çempionu olmasalar da, dünya çempionu idilər. Əsas idmançının istəyidir. İdmançıların son durumuna əsasən onları dünya çempionatına aparacağıq.
– Ötən il Peruda yeniyetmələrin dünya çempionatı da var idi və onda siz yeniyetmələrin baş məşqçisi idiniz. Ora baş məşqçi kimi siz getməmişdiniz. Bunun səbəbi nə idi?
– Onda mən paralel olaraq kişilərdən ibarət baş məşqçinin köməkçisi idim. Həmin ərəfədə Paris Olimpiya Oyunlarında idim. Bu yarışlar üst-üstə düşmüşdü. Ona görə də məşqçilərdən Nicat Şıxəlizadə ilə Emil İskəndərov Peruya getmişdi. İş elə gətirdi ki, bu il də gənclərin dünya çempionatı orada olacaq. Qismət olsa, bu dəfə gedərəm.
– Dünya çempionatında kimdən qızıl medal gözləyək?
– 60 və 66 kq çəki dərəcəsində Avropa çempionu olan Nihad Məmişov və Məhəmməd Musayevdən dünya çempionatında da qızıl medal gözləmək olar. Ancaq bayaq dediyim kimi, hər şey ola bilər. Onu da deyim ki, bu yarışda Avropa 3-cüsü olan Nizami İmranovdan başqa, əksəriyyəti yeniyetmələrdən gənclərə keçən idmançılardır. Onlar da 1-2 il gənclərdə güləşə biləcək və inanıram ki, gələcəkdə böyüklərdə yüksək nəticələri olacaq.
Səbuhi Musa
Bratislava