Slovakiyanın paytaxtı Bratislavada keçirilən cüdo üzrə gənclər arasında Avropa çempionatına yekun vurulub.

Prosport.Az-ın Bratislavaya ezam olunmuş əməkdaşı xəbər verir ki, qarışıq komanda yarışında millimiz medalsız qalıb və 5-ci yerlə kifayətlənib.

Son Avropa çempionatının qalibi olmuş komandamız 1/4 finalda İsveçrəyə 2:4 uduzub.

Nigar Rzayeva (70 kq) April Linn Fohuda, Aslan Kotsoyev (90 kq) Ten Uleveyə, Nigar Süleymanova (+70 kq) Tesa Ebonaya və Əbil Yusubov (73 kq) isə fərdi yarışlarda qalib gəldiyi Stefan Maytinə yenilib. Cüdoçularımızdan yalnız Ramazan Əhmədov (+90 kq) Lorenso Ensə və Aydan Vəliyeva (57 kq) Mirya Polhaymaya qalib gəlib.

Komandamız bürünc medal uğrunda təsəlliverici görüşdə meydan sahibi Slovakiyaya asanlıqla qalib gəlib – 4:0. Süleyman Şükürov (90 kq) Matey Pexaya, Nigar Süleymanova (+70 kq) Nina Filkorovaya, Ramazan Əhmədov (+90 kq) Oliver Şeffelə və Aydan Vəliyeva (57 kq) Patrisia Tomankovaya qalib gəlib.

Yığmamız bürünc medal uğrunda görüşdə isə Almaniyaya 2:4 uduzub. Nigar Süleymanova (+70 kq) Matilda Sofi Nimayaya, Aydan Vəliyeva (57 kq) Tabea Nika Meklenburqa, Nilgün Rzayeva (70 kq) Sara-Joy Bauaya və Süleyman Şükürov (90 kq) Pol Fridrixsə uduzub. Yalnız Ramazan Əhmədov (+90 kq) Mortaza Suhaya və Əbil Yusubov (73 kq) Melvin Noaka qalib gələ bilib.

Yarışın qalibi isə ötən ilin finalçısı Fransa olub. Onlar finalda Türkiyə millisinə 4:1 qalib gəlib. Bürünc medalları isə Almaniyadan başqa, Rumıniyaya 4:2 qalib gələn İsveçrə millisi də qazanıb.

Qeyd edək ki, fərdi yarışlarda ilk gündə 3 medal (2 qızıl, 1 bürünc) qazanan Azərbaycan ümumi sıralamada 3-cü olub. İtaliya 4 qızıl, 2 gümüş və 3 bürünc medalla liderliyini qoruyub. Fransa isə qarışıq komanda yarışında qazandığı qızıl medalla Azərbaycanı keçərək 2-ci olub (2 qızıl, 3 gümüş, 5 bürünc).