Slovakiyanın paytaxtı Bratislavada keçirilən cüdo üzrə gənclər arasında Avropa çempionatında bu gün mübarizəyə qoşulan 4 idmançımız yarışdan erkən ayrılıb.

Prosport.Az-ın Bratislavaya ezam olunmuş əməkdaşının verdiyi xəbərə görə, oğlanlarda 90 kq çəkidə Avropa çempionumuz Aslan Kotsoyev 1/8 finalda dünya çempionu, gənclərdə reytinqin 1-cisi Luka Cavaxişviliyə ipponla uduzub.

Bununla da osetin əsilli cüdoçumuz da medalsız qalıb.

Xatırladaq ki, bu gün mübarizəyə qoşulan idmançılarımızdan Davud Namazlı (100 kq), Ramazan Əhmədov (+100 kq) və Nigar Süleymanova (+78 kq) ilk görüşdə uduzaraq mübarizəni dayandırıb.

Qeyd edək ki, Avropa çempionatının sabahkı son günündə komanda yarışları keçiriləcək. 1/4 finalda Azərbaycan Yunanıstan – İsveçrə cütünün qalibi ilə qarşılaşacaq.

14:51

Slovakiyanın paytaxtı Bratislavada keçirilən cüdo üzrə gənclər arasında Avropa çempionatında bu gün mübarizəyə daha 4 idmançımız qoşulub.

Prosport.Az-ın Bratislavaya ezam olunmuş əməkdaşının verdiyi xəbərə görə, oğlanlarda 90, 100, +100 kq, qızlarda 78 və +78 kq çəki dərəcələrində mübarizəyə start verilib. Qızlarda 78 kq çəki dərəcəsi istisna olmaqla, digər kateqoriyalarda idmançılarımız yarışır.

90 kq çəkidə 1/16 finalda Aslan Kotsoyev Levente Kissə (Macarıstan) ipponla qalib gəlib.

100 kq-da həmin mərhələdə Davud Namazlı rusiyalı İvan Titinkinə (IJF) ipponla uduzaraq mübarizəni dayandırıb.

+100 kq-da 1/8 finalda Ramazan Əhmədov Yannis Antoniuya (Kipr) ipponla uduzaraq medalsız qalıb.

+78 kq çəki dərəcəsində qız idmançımız Nigar Süleymanova da türk əsilli cüdoçu Emma-Melis Aktaşa (Estoniya) osaekomiyə düşərək uduzub.

Qeyd edək ki, ilk gündə Azərbaycanın 3 idmançısı medal qazanıb. Nihad Məmişov (60 kq) və Məhəmməd Musayev (66 kq) qızıl, Nizami İmranov (66 kq) bürünc medalı əldə edib. Azərbaycan 2-ci gün medal qazanmasa da, sıralamada 2-ci yeri qoruyub. İtaliya 3 qızıl, 2 gümüş və 3 bürünc medalla liderdir.