19 yaşlı cüdoçumuz Məhəmməd Musayev Slovakiyanın paytaxtı Bratislavada keçirilən gənclər arasında Avropa çempionatında qalib oldu.

Prosport.Az artıq ikiqat Avropa çempionu olan idmançımızdan müsahibə götürüb.

– Təəssüratlarınızı eşidək...
– Avropa çempionu oldum. Çox xoşbəxtəm. Neçə vaxt idi ki, buna görə əziyyət çəkirdim. Allaha şükür ki, bəhrəsini gördük. Bundan sonra əsas hədəfim oktyabrda Perunun paytaxtı Limada keçiriləcək dünya çempionatında qalib gəlmək olacaq. Ora da bu yarışa hazırlaşdığım kimi gedəcəyəm.

– Qızıl medalı kimə həsr edirsiniz?
– Medalımı ailəmə, ən çox da anama həsr edirəm. O mənim üçün çox əziyyət çəkib. Buradan onu öpürəm. Şəxsi məşqçim Hikmət Əliyevə təşəkkürümü bildirirəm. Onun da mənim üzərimdə çox əziyyəti olub.

– İstər 60 kq-da, istərsə də 66 kq çəki dərəcəsində mübarizə aparan 2 azərbaycanlı idmançı 1/4 finalda bir-biri ilə qarşılaşdı. Məğlub etdiyiniz Nizami ilə əvvəl qarşılaşmışdınız?
– Yox. İndiyədək heç bir azərbaycanlı ilə beynəlxalq turnirdə qarşılaşmamışdım.

– Finalda hesabda geri olsanız da, 2 yuko və sonda ipponla fransalı rəqibinizə qalib gəldiniz...
– Final həqiqətən də çətin keçdi. Orada ancaq qələbə barədə düşünürdüm. Bu, idmandır. 1 saniyənin içərisində uduza da, qalib gələ də bilərsən. Məndə də elə oldu. Əzmkarlıq göstərərək qızıl medalın sahibi oldum. Bunun üçün xoşbəxtəm.

– Yeniyetmələrdə Avropa çempionluğundan sonra gənclərdə də bu nəticəni təkrarladınız. Hansı medal daha dəyərlidir?
– Əlbəttə ki, bu.

Səbuhi Musa
Bratislava